Atualità
Paië la chëutes online – software a desposizion
USP – Tl daunì puderà i zitadins nce paië la chëutes online, tres computer. Sun ncëria dla Provinzia y dl Cunsorz di chemuns à la “Südtiroler Informatik AG” svilupà n software tres chël che n possa paië la chëutes y straufonghes via homebanking. “Per l zitadin iel na gran sauridanza” nscì l assessëur Hans Berger.
L software ie njenià y muessa mo unì sëurantëut dala banches. Pernan che la ie pona tan inant, possa duc chëi che à l homebanking paië si debic pra l’aministrazion publica tres computer. Sibe la Provinzia, ma nce i chemuns jirà inant n var al iede per pité chësc servisc pra duc i paiamënc.
N iede saral i chemuns a pité l servisc canche l ie da paië ite la chëuta chemunela ICI y la chëutes sun l refudam. La Provinzia ie tl lëur de se njenie ca che iscrizions a cursc y straufonghes posse unì paiedes ite tres l homebanking. La bona per l zitadin ie che l servisc ie debant y l’aministrazion publica se sparania truep lëur.
“Tla proscima enes se aspieten che la banches jonte pro la puscibltà de paiamënc al aministrazion publica tres homebanking” nsci l assessëur cumpetënt Hans Berger.
AS
