Atualità
Maestres de integrazion nce te scolina
USP - Tla scoles y scolines ladines saral dal proscimo ann de scola 13 persones de plu. Per l prim iede saral nce tla scolines ladines l aiut de maestres per l’integrazion de mëndri cun dificulteies. L assessëur Florian Mussner vëij chësc sciche n gran var per na miëura furmazion di mëndri cun dificulteies, che sta dassënn a cuer.
Tla scolina manciovel nchin a sën maestres per la intergrazion che ti stebe do a mutans y mutons cun esigënzes particuleres. De chësc mpëni se à nchin a sën messé to su la maestres cun la culaburadësses de sezion deberieda cun assistëntes, da chësta ann inant cualifichedes sciche “culaburadësses per l’integrazion”.
Na maestra per l’integrazion à sëuraprò a si furmazion (dal 2002 a livel universiter), nce na spezialisazion per handicap. Tla fasa dai 3 ai 6 ani che ie de gran mpurtanza per i mëndri, ti possel nscì unì pità n aiut pedagogich y spezialisà. “N bon sustëni di mëndri cun dificulteies tl’età dla scolina ie de gran valor per scumencé bën la scola de ublianza”, nscì l assessëur Florian Mussner. L debujën de chësta persones spezialisedes de plu te scolina fova bele unì a lum tl’ancuntedes cun l'assessëur, i respunsabli y culaburadëures dla scola, scolina y i nciariei per la integrazion. Per n auter ann de scola saral a chësta maniera trëi persones che possa se dediché de plën ala intergrazion tla scolina. Per i ani do iel udù dant de mëter mo persones cualifichedes a desposizion per miuré l servisc educatif y furmatif tla scolina.
Sëuraprò ala trëi persones per l’integrazion te scolina, saral mo trëi culaburadëures per la ntegrazion tla scola ladina n generel. Tla scola ladina saral d’autonn sies nsenianc de plu tla scoles mesanes. Chësc davia che la cumpëida di sculeies y nce dla tlasses ie aumenteda. Una persona de plu saral tl proscimo ann nce tla scoles de mujiga dla Val Baida y de Gherdëina.
Per l assessëur ladin iel mpurtant pudëi judé i sculeies te si ani jëuni y nscì saral tl proscimo ann de scola de ndut 6 persones de plu per l’integrazion y 7 nsenianc de plu tla scola y scola de mujiga ladina. I nsenianc de plu ti va tl medemo mumënt nce a bën dla tlasses ulache l nseniamënt possa deventé de var plu spezifich.
Nce n cont dla furmazion de nsenianc per l’integrazion uniral miurà l servisc. Da pert di ispetorac ladin y tudësch deberieda cun l’Università a Persenon y la respunsabla per le servisc dl'integrazion dla scola ladina Carla Comploj, vëniel njenià n curs de furmazion per maestres dla scolina che ulëssa se spezialisé te chësc ciamp. “Chësc curs meterà man de autonn y jirà inant per doi ani”, prejënta la diretëura dla scolines Edith Ploner.
as
