Atualità
Curiera da instà te Sëlva y a Urtijëi
USP – Cun l mëter man dla sajon da instà à te doi luesc de Gherdëina metù man l servisc dla curiera da instà: a Urtijëi iel l segondo iede, per Sëlva iel l prim iede che l vën pità chësc servisc nce d’instà. “L model dla curiera da instà à valù y ti dà a chëi dl post y ai fulestieres l mesun de se muever zënza adurvé l auto”, nscì l assessëur ala mubilità Thomas Widmann.
Da (inier) dumënia nchin ai primes de utober pieta l servisc la puscibltà de arjonjer raions ora di zëntri de Urtijëi y Sëlva, zënza to l auto. A Urtijëi furnea la linea 355 avisa sciche l ann passà cun la medema raida y l medemo orar. Senté ite possen nchin sa Bula y sa Sacun, ma nce tl Piz Dedora, ora l Grien y sambën tl zënter dl luech. Furnà vëniel da sies a ot iedesc al di y chësc danter la 8.15 nchin la 18.45. L ann passà fova la curiera da instà a Urtijëi n servisc defin turistich, chëst ann iel per l prim iede n servisc provinziel.
Defin nueva iel la curiera da instà te Sëlva. L servisc de trasport publich tl luech fova nchin a śën me ntan la sajon da inviern. La linea 357 dla SAD cunlieia i raions ora La Sëlva, Plan da Tieja, l Daunëi y Val cun l zënter dl luech. Danter la 8.25 daduman nchin ala 18.10 furnea la curieres de ndut set iedesc.
Sëuraprò ala curieres ti luesc, furnea da lugio nchin ai primes de setëmber inò l Sella-Ronda-Bus. “Cun chësc servisc possen nce arjonjer i jëufs respetan l ambient” nsci Widmann. Da nuef iel chëst instà che l ne vën nia plu fat la cherta spezifica per l Sella-Ronda-Bus. N puderà to la "Val Gardena Card", l "Mountain Pass", la "Panorama Card", la "Mobilcard" o la cunesciuda chertes de valor per furné cun chësta curieres.
as
Galaria dales fotografies
Curiera da instà te Sëlva y a Urtijëi
