Atualità
Mostra de sasc da copes tl Museum Ladin
USP – Sasc da copa da plu pertes dl mond iel da sën inant da udëi tl Museum Ladin a San Martin. L se trata de na mostra esclusiva a livel intenaziunel prejenteda an na maniera moderna. Tres chësta mostra possen ti ruvé plu daujin al mister de co che ie unides a se l dé la copes.
La copes de chis sac ie bujes realisedes artifizialmënter a forma de mesa codla, cun n diameter de feter 5 cm. Si senificat y si funzion resta danieura un di majeri misteres dl’archeologia mo nia stlarii. La teories va dal aduvanza per sacrifizes nchin a chertes astronomiches o tofles che mostra la stedes. Generalmënter vëni metui n relazion cun l cult, y cun la magia davia che n i à suvënz abnei te lueges de cult o pra fosses. Na marueia ie che chisc sasc da copa ie unic abinei te dut Südtirol y nchinamei sun duc i cuntinënc ora che tl Antarktis.
Danter i pec che ie da udëi tl Museum Ladin iel tei che vën dla raions defrënc dl Südtirol, na copia dl cunescù sas da copa de Bunsoh (Schleswig-Holstein) y n’animazion tridimensionela sun l computer de l templ plu vedl dl mond, l Göbekli Tepe tla Turchia. N va tlo de revies tl tëmp de 11.000 ani. La mostra dëssa vester stimul acioche i vijitadëures se feje nstëss na idea di sasc misterieusc.
La mostra “mister di sasc da copes” ie mo da pudëi vijité nchin ai 24 de agost, dal merdi ala sada dala 10 nchin la 18 y de dumënia domesdi dala doi nchin ala sies tl Museum Ladin a San Martin. De agost vëniel nce giaurì la portes de lunesc (dala 10 ala 18). L ntreda ala mostra ie debant.
as
