Atualità
"Abo 60+" da ncuei inant
USP – Furné per 100 Euro cun duc i mesuns publics de trasport tla Provinzia de Bulsan. Chësc ie da ncuei (16 de juni) puscibl per seniores sëura 60 ani. Per giapé l “Abo 60+” bastel avëi pea l documënt y l numer de codesc fischel.
Acioche seniores posse se nuzé plu saurì di mesuns publics de trasport à l dipartimënt de mubilità dla Provinzia de Bulsan cun l assessëur Thomas Widmann nvià via l “Abo 60+”. “L sistem ie l medemo sciche la chertes per sculeies, per n priesc pauscial possen furné cun i mesuns ntan dut l ann” à dit Widmann. Per l 100 Euro possen furné cun la curieres de linea, chëles te zità, cun la ferata regiunela y nce cun chëla furnadoies che fej pert dla linies provinzieles.
L abunamënt per seniores sëura 60 ani ie da giapé ulache n fej nce i autri abunamënc per l servisc de trasport publich. La luegia plu daujin ala Val Badia ie la stazions dla curiera y dla ferata a Burnech. Per Gherdëina iel plu daujin a fé l abunamënt a Ciastel tla Cassa Raiffeisen. L tleca avëi pea n documënt y l numer de codesc fischel.
Mo de miëura cundizions pieta la Provinzia a seniores sëura 70 ani. Ëi puderà furné cun la curiera, la ferata y vel furnadoia defin debant. La cherta ti unirà proscimamënter mandeda n cësa.
as
