Atualità

Trafich | 19.06.2008 | 17:25

Curieres ntan l instà 2008 for plu saurides

USP – Cun i orars dla curieres da d’instà ie l servisc unì slargià ora y miurà. Da n sada ai 21 de juni va n drova na lingia de nuviteies che ie unides damandedes da truep zitadins y da cunsorc de turism.

Linies nueves, de plu viages, curieres che furnea nce de dumënia y i dis de festa y de miëura cuinzidënzes – passa 60 de majera y mëndra nuviteies prejënta i orares nueves per l instà. Danter i raions tuchei iel nce la doi valedes ladines Gherdëina y la Val Badia. “Truepa nuviteies ie de utl per l turism y per fé jites, mplu unirales nce tenides d’autonn” à dit l assessëur de cumpetënza Thomas Widmann.

Cun la fin dl ann de scola iel daniëura unì mudà i orares dla curieres. “Ntan i mënsc de nseniamënt te scola vëniel sambën cialà ai feter 40.000 sculeies y studënc, che fej ora doi terzi de chëi che va uni di cun la curiera” spiega l assessëur ala mubilità. Ntan chësc ultimo ann de scola iel sta 28.900 sculeies che ie furnei cun na cherta per sculeies y autri 10.800 che se à nuzà dl “Abo+” per studënc. Per l trasport de sculeies à la Provinzia finanzià 437 servijes n plu che ne furnea sambën nia ntan la feries y che unirà per l autonn inò metui a ji da nuef.

La mudazions dl orar dla ferata vën al livel de Europa fates de dezëmber.
La publicazion cun i orares nueves dla curieres y dla ferata tl Südtirol unirà spartida ora ntan la proscima ena.

La linea tla val de Puster resterà śareda dal 21 de juni per lëures che vën fai sun duta la trassa. Nchin ai 20 de lugio iel unì metù a ji n’alternativa de curieres.

as

Galaria dales fotografies