Atualità
Parëies a Puntives: mez lëur bele fat
USP- I lëures per seguré l parëi sëura la streda de Puntives va inant drët bën. Per la sajon da inviern puderan passé l toch danter Runcadic y Puntives cun plu segurëza. Chësc ie unì detlarà ncuei (merdi, 30 de setëmber) pra na vijita di lëures da pert dl assessëur ai lëures publics.
Per Unissant ie udù dant de finé via la segonda y ultima pert di lëures per seguré l parëi pra l stradon a Puntives. Chësc à i respunsabli dl proiet spiegà ncuei danmesdì al assessëur provinziel ai lëures publics. Sun na lunghëza de feter 200 metri iesen tl lëur de mëter su na rë de segurëza. “L lëur plu periculëus ie stat a tò ju i lëns suinsom dl parëi de crëp” à dit l respunsabl dl proiet Claudio Carraro. Feter 60 lëns ie unic taiei per schivé che i pudëssa tumé ju sun streda. Sun na spersa de passa 10.000 metri cuadrac iesen tl lëur de curì l parëi cun na rë de acel.
“Fajon chisc lëures ajache l parëi y i lëns ne fova nia plu segures per la truepa persones che passa di per di da Puntives ite” nsci l assessëur ai lëures publics. “For inò audions dal servisc ala stredes che sun la streda danter Pruca y Urtijëi vëniel ju sasc y perchël fovel gran ëura de fé zeche”.
“Dai primes de setëmber ie i lëures jic inant do program y śën an bele fat feter mez l lëur” à dit l geologh Matteo Marini. Sun la pert dessëura dl parëi de crëp de porfir se à bele giaurì de majera sfëntes y iust chësc toch ie nce per i 10 lauranc stat l plu periculëus. La cordes, broces y la rëies de acel ie n gran pert unides purtedes suinsom l parëi de 70 metri cun l joler. La firma Unirock de Bulsan à giapà da fé i lëures lascian do l priesc de 35% permez ala soma proieteda. L custimënt de chisc lëures ie nsci de 400.000 Euro.
Tl raion danter Puntives y Runcadic ova n gran vënt dan plu ani sturcià truep lëns. L crëp sëura streda se ova ntlëuta ënghe giapà na scasseda y l se ova giaurì sfëntes. Dan doi ani iel unì fat na prima pert de lëures. Śën iesen tl lëur de finé la segonda pert.
as
