Atualità
Dumandes de cuntribuc per studënc nchin ai 16 de utober
USP – Studënc che va a na scola auta o che fej cursc a tëmp plën tla scoles prufesciuneles y che stà ora de familia de albierch, giapa cuntribuc dala Provinzia. La dumandes possa unì dates ju nchin ai 16 de utober.
Per chësc ann de scola iel udù dant de dé ora 2139 cuntribuc. Chisc scioldi ti va a studënc che ne possa ntan l ann de scola nia viver pra si families. I cuntribuc vën dai ora alo dl davani danter 1.200 y 2.800 Euro. Deferënzies iel nce aldò dla sort de albierch. Per studënc che ie me ntan l di te na cësa per studënc ie l cuntribut smendrì de feter 30 percënt, chëi che furnea uni di a cësa ie l cuntribut smendrì dl 80 percënt. L aiut economich giapa chëi studënc che à tl ann 2006 abù n davani, zënza chëutes, nchin a 21.000 Euro. Chësc sce i ne n à nia bele giapà d’autri cuntribuc per la medema scola o sce i ne possa nia sté debant de albierch.
I formuleres per damandé i cuntribuc giapen tl Ufize provinziel de assistënza scolastica y universitera, tla direzions dla scoles y ti ufizies de cunsulënza prufesciunela. La dumandes possa unides dates ju nchin ai 16 de utober tla scoles. Me studënc de scoles privates possa dé ju la dumanda tl ufize provinziel de cumpetënza.
Per la dumandes ne val nia debujën de documënc. La nfurmazions che n dà sëura ie sun basa de autocertificazion y vën cuntroledes a cajo. Sce l vën fat cuntroi possa l Ufize provinziel de assistënza scolastica se damandé i documënc.
Nfurmazions plu avisa giapen tl Ufize provinziel de assistënza scolastica a Bulsan, streda Andreas Hofer 18 (2. partimënt, majon 205) o tres telefonn ai numeri 0471 413305, 0471 413344, 0471 412924 o 0471 412925. I formuleres possen nce se tò ju da internet, da www.provinz.bz.it/bildungsfoerderung, sun la plates provinzieles.
as
