Atualità
Documentazion de cianties populeres dla Ladinia
USP – Tl Istitut Ladin Micurà de Rü vëniel ncuei (mierculdi 8 de utober) prejentà l liber sun la cianties populeres tla valedes ladines dla Dolomites. L se trata de na documentazion de na nrescida scientifica, fata dan 100 ani. La prejentazion a San Martin de Tor scumëncia dala cich domesdì.
L liber de 800 plates ie l resultat de n proiet sun la ciantia populera tla Ladinia che ie unì metù man dan cater ani. Ti ani 1904-1912 ova l prufessëur dl’Università Dispruch Theodor Gartner cun si culaburadëures scrit su y analisà la ciantia populera tl Friul, tla Val de Non y tla Dolomites. Uemes de cultura de nosc luesc ova ntlëuta sustenì dassënn l lëur dl prufessëur Gartner ntitulà “Das Volkslied in Österreich”. Cun la gran vieres ne fova chësc lëur nia plu jit inant. I istituc culturei ladins dl Friul, de Fascia y de Badia/Gherdëina à ulù documenté chësc lëur da ntlëuta juntan pro trascrizions a na maniera che n possa ntënder miec i tesc scric te na rujeneda plutosc primitiva. N culaburazion danter i istituc Micurà de Rü, Majon di Fascegn y la Societât Filologjiche Furlane iel unì tëut ca cie che fova tl “Landesarchiv” de Dispruch.
L liber sun la ciantia populera ladina tla Dolomites ie la terza pert dla documentazion dl gran lëur scientifich de 4.200 cianties, tesc o cuntedes y 740 trascrizions musicheles. I autri doi libri ie dedichei ala pert friulana y ala pert Anaunia dl Val de Non.
Tl liber sun la ciantia populera ladina tla Dolomites iel publicà de ndut passa 650 cianties y cuntedes. I pec ie te duta trëi rujenedes y n pue’ manco de mec ie tla rujeneda ladina. Per vel pez an nce pudù publiché la notes. Tla pert de Fascia, cureda da Fabio Chiochetti, iel feter 200 pec. Per la Val Badia y Mareo nen iel 280, per Gherdëina 70. La documentazion dla ciantia populera tol nce ite Fodom (35 pec) y Ampëz (70 pec). L Istitut Ladin Micurà de Rü à nciarià Barbara Kostner y Paolo Vinati cun chësc gran lëur de tueda y trascrizion.
L liber ntitulà “Il canto popolare ladino – Dolomiti” ie da giapé tla sëntes di Istituc Culturei ladins per 38 Euro. Tla proscima enes uniral mo dat ora n CD cun la registrazions dla vedla cianties. Chësta CD ie pert dl liber y unirà mandeda do a chëi che à tëut l liber.
as
