Atualità
Da ncuei televijion digitela
USP – La trasmiscions dla RAI de Bulsan y dl RAI3 vën da ncuei (14 utober) mandedes ora cun la tecnica digitela. A Bulsan à l Presidënt dla provinzia ufizialmënter mpià l sistem digitel dla RAS.
Sun la rë dla strutura radiotelevijiva speziela dla Provinzia de Bulsan RAS vëniel da ncuei (14 utober) mandà sun dut l raion dla Provinzia i programs dla RAI de Bulsan y de RAI3 tla forma digitela. L sistem ie unì mpià dal Presidënt dla provinzia y dal’assessëura ala cultura che à auzà ora chësc var ie pert dl mpëni dl guviern provinziel per giapé la televijion digitela te duta la provinzia.
L presidënt à rujenà de n mumënt mpurtant tla storia dla comunicazion tla Provinzia de Bulsan. “Tres la televijion digitela iel mesun udëi la trasmiscions te na miëur cualità.” L presidënt à laudà i tecnics dla RAS y dla RAI per la bona culaburazion y à fat al savëi che n ie tl lëur de purté duc i canai de televijion, publica y privata, nchin ala fin dl 2009 sun la rë digitela.
Cun la RAI de Bulsan y RAI3 bis digitela vëniel stlut ju n lëur scumencià dan 11 ani cun l radio publich y che porta śën l RAI3 bis dal 70 al 99,6% dla populazion, nsci l diretëur dla RAI de Bulsan Carlo Corazzola. Al mumënt vëniel tres la rë digitela RAS4 mandà inant doi canai svizeri, RAI 3 y Rai Sender Bozen. Tres RAS2 possen giapé i doi canai dl ORF, l ARD y l ZDF te cualità digitela.
as
