Atualità
Cianties, juesc y stories per mëndri dla scolina
USP – Cun l aiut de cianties, juesc y stories possa i mëndri dla scolina avëi n cuntat cun l’autra rujenedes de nosta provinzia. I trëi Istituc pedagogics dla Provinzia de Bulsan à dat ora n liber cun CD nuef che pieta na basa per chësc cuntat cun la trëi cultures. Ncuei (16 de utober) iel unì prejentà a Urtijëi tla Scolina Salieta la publicazion “Miteinander – Insieme – Deboriada”.
Tl liber nuef per la scolines vëniel adurvà la trëi rujenedes dl Südtirol. Vel pez ie per badiot y vel auter per gherdëina. Cun l aiut de chësc liber possel nce unì mustrà cianties y stories tipics ai mëndri dl’autra grupes de rujeneda. L vën tres chësc strumënt didatich pità la puscibltà de cianté per ejëmpl la medema ciantia te trëi rujenedes. Chësc vel nce per vel juech, storia o rima. Ai mëndri de duta trëi grupes de rujeneda ti vëniel nsci pità na maniera lesiera y adateda a si età per se giaurì al’autra cultures. Tla scolines ladines vëniel bele adurvà de plu rujenedes. Chësta ie na gran richëza che vën śën inò sustenida cun material didatich nuef. Na bona comunicazion ie la fundamënta per mparé a priejé i ujins y per se capì miec. L liber cun tesć, notes, ilustrazions y registrazions porta nce la rujeneda ladina tl’autra scolines dl Südtirol.
Tl liber de feter 100 plates ie spartì te cater pertes. Danora iel na abineda de cianties, rimes y juesc. Tlo iel velch per i plu pitli cun nina nanes, juesc dl cërtl, taialongies, juesc cun i dëic y rimes da cumpedé. La publicazion di trëi istituc pedagogics dla Provinzia de Bulsan ie tla segonda pert dedicheda a cianties y juesc duc deberieda. Tlo vëniel prejentà l medem juech tla trëi rujenedes, nia te na traduzion parola per parola, ma ti lascian a duta trëi rujenedes si forma. Tl liber metù a jì n culaburazion cun la direzions dla scolines iel tl’ultima doi pertes unì dat lerch a cuntedes y lijëndes dl Südtirol, y pona a na storia repurteda tla trëi rujenedes.
Per la pert ladina se à Frida Comploj, dirijënta dla Scolina de Sëlva dat ju dassënn. La coordinazion de dut l liber cun doi CD y de ndut 57 registrazions ie unida cureda dal Istitut Pedagogich de rujeneda taliana, che à deberieda cun l Istitut Pedagogich Ladin nce curà la majer pert dl proiet. La cianties y la stories per ladin sun la CD ie unides purtedes dant da Silvia Mussner y Gertrud Pitscheider. Edith Ploner, direturia dla scolines ladines à reprejentà l cunsëi diretif dl Istitut Pedagogich Ladin. La traduzions ladines à fat Daria Valentin y Milva Mussner.
as
