Atualità
Cherdei ala veles tla valedes ladines
USP – Tla doi valedes ladines dla Provinzia de Bulsan ie n dumënia ai 26 de utober passa 15.000 persones cherdedes a jì a lité. Me l 4,4% di litadëures dla Val Badia y de Gherdëina ie jic a sté oradecà.
Tla Val Badia ie 8.103 persones cherdedes a lité, te Gherdëina 6.967. De ndut iel nsci 15.070 persones dla doi valedes ladines che possa lité. La cumpëida dl’ëiles permez ai ëi ie drët valiva. L’ëiles che possa lité te tramedoi valedes ie de 122 de plu permez ai ëi, chësc fej me ora na deferënzia de 0,8%.
Paredlan la doi valedes cun duta la provinzia de Bulsan, iel te Gherdëina y tla Val Badia 3,9% di litadëures. De ndut iel tl Südtirol 387.796 persones che possa fé pea chësta veles.
Nce chëi che ie jic a viver oradecà ie cherdei ala veles provinzieles. Tla doi valedes iel 656 litadëures che à la residënza oradecà. Tla Val Badia fej chisc ora l 3,5% di litadëures, (284 persones). De plu nen iel te Gherdëina ulache l ie l 5,3% che vif oradecà (372 litadëures).
Pra la veles provinzieles ai 26 de utober possa jì a lité duc i zitadins sëura 18 ani che ie tla listes de chëi che à l dërt de lité. Coche spiega i respunsabli dla repartizion provinziela di servijes zentrei ie l di de referimënt de chësta listes l doi de setëmber 2008. Per puei jì a lité muessen viver da amaca cater ani te n chemun dla region y vester stai la majera pert de chësc tëmp tla provinzia de Bulsan.
as
