Atualità
Bele de utober plu scioldi per la families
USP – Nia plu 80 ma 100 Euro al mëns paia la Provinzia per la families. L cuntribut auzà de n chert ie un di pruvedimënc dla Jonta provinziela per dé plu forza de compra, y ie unì publicà tla gazëta ufiziela dla region. L regulamënt va n drova ai 29 de utober, ma davia che l dipartimënt provinziel per l soziel à bele laurà danora, possa i cuntribuc auzei per mutons bele unì paiei ora per l mëns de utober.
Bele de agost ova la Jonta provinziela anjenià de auzé i cuntribuc ala families, śën ie l regulamënt nce unì publicà tla gazëta ufiziela. Cun l 29 de utober possa la families fé cont cun 100 Euro mpede 80 Euro sciche nchinamo. “L cuntribut per families ie per 11.870 families sciche n 14esim paiamënt de 1.200 Euro netto” dij l assessëur al soziel.
Te si assessorat iel ntant bele unì laurà danora acioche i scioldi per la families possa bele unì paiei ora per l mëns de utober. Davia che la somes possa permò unì paiedes ora do che l regulamënt ie jit n drova, se sposta i paiamënc de n valgun dis nchin ala prima ena de nuvëmber.
as
