Atualità
900 servijes dl’aministrazion publica tl’internet
USP – A chëi che uel avëi na miëura vijion sun l’aministrazion publica vëniel pità n aiut. Da duman (29 de utober) jirà online la plates internet di 900 servijes publics dla Provinzia de Bulsan.
La pratiches che n à debujën de fé reverda la situazions de vita plu defrëntes: chi che ie deventà genitore, chi che uel fé na plura, chi che uel nuzé n mesun publich de trasport, chi che uel jì n pension. Sce n ne sà nia avisa ciuna aministrazion che ie de cumpetënza y cie che l ie da fé, abinen riesc na resposta segura sun la nueva plates internet di servijes dl’aministrazions publiches dla Provinzia de Bulsan. Chësc servisc jirà duman online sun la plates provinzieles www.provinzia.bz.it tl internet.
La plates nueves pieta passa 900 servijes dla Provinzia, di chemuns, dla Cumuniteies raioneles y dl Servisc saniter. I servijes ie da abiné aldò dla situazion de vita dl zitadin, di argumënc, dla categuria de chëi che pea do l servisc y dla sort de pratica. A uni maniera iel nce puscibl ruvé pra i servijes jan do la partizion istituzionela. “Cun chësta plates pitons n servisc zentralisà che tol ite duc i servijes, zënza tenì cont dla cumpetënzes dla singula aministrazions publiches”, spiega Alfred Aberer, cuordinadëur dl proiet E-government dla Provinzia.
L zitadin giapa ueia de adurvé i servijes nce tres l cheder tler y la prejentazion scëmpla dla plates. La pert tecnica de chëstes ie unides svilupedes dala sozietà de nfurmatica dl Südtirol y pona cuncretisedes dala Provinzia, i Cunsorz di chemuns y dal Servijsc saniter provinziel.
as
