Atualità
Proiet per nsenianc de mendranzes prejentà tl’Estonia
L model de furmazion INFO per nsenianc dla mendranzes dl’Europa ie unì prejentà da reprejentanc dla Scola Ladina tl’Estonia. Dai 24 ai 25 de utober 2008 iel stat a Tallinn tla Estonia la cunferënza europea sun l nseniamënt dla rujenedes aldò dl sistem CLIL. Chësc sistem plutosc nuef uel dì “Content and Language Integrated Learning” y praticamënter mienel “nsenië rujenedes tres l cuntenut”.
L sistem de nseniamënt tla scoles paritetiches ladines ie bele da 60 ani incà urganisà do chësc sistem, ma permò ti ultimi 20 ani iel unì studià avisa da linguisć y pedagogics dantaldut dl Canada y dl Finnland.
Davia che la Estonia à purtà ite l sistem CLIL te duta si scoles, dantaldut per ntegré la gran mendranza de rujeneda Russa (ntëur l 30%), an ulù urganisé na gran cunferënza europea propi a Tallinn sota l titul CLIL Fusion.
Te chësc cheder ie la Ntendënza Ladina, l Istitut Pedagogich Ladin y l OLFED, (l Ofize ladin formazion e enrescida didatica dla scoles de Fascia) unì nviei a prejenté si proiet Comenius dal titul INFO, che ie unì laurà ora dal 2005 inant per ti pité n model de furmazion y de ajurnamënt ai nsenianc dla mendranzes dl’Europa che lëura te scoles cun plu rujenedes.
L proiet ie unì prejentà da Roland Verra, Olimpia Rasom y Barbara Fanton.
L cunvëni ie ënghe stat na ucajion per tò su cuntat cun esperc nternaziunei tl sistem CLIL, nce pensan ala culaburazion tla rë europea de scoles che lëura cun chësc sistem de nseniamënt. Per duc chëi che ie nteressei ala nuviteies n chësc cont iel mesun se scrì ite te l network de culaburazion europeich che à inuem ccn. (www.ccn-clil.eu)
usp
