Atualità
Dala Jonta provinziela dl 10 de nuvëmber
USP- Tan granda che possa vester na veranda, paiamënc per maestri, aiuc per l’Uganda, fé dan nuef la patent, agenzia de mubilità y azions dla Brennercom; chisc ie stai i argumënc zentrei che la Jonta provinziela de Bulsan à tratà ncuei (10 de nuvëmber) te si senteda. L presidënt Luis Drunwalder à prejentà i argumënc de majer ntres.
Regula per la verandes
Aldò dla Jonta provinziela possa la verandes arjonjer l 8% dla spersa (brutto) de n partimënt. Acioche la veranda ne vënie nia cunscidreda spersa de cuatier, muessela avëi na grandëza danter 9 y 30 metricuadrac. Da tenì ite iel sambën nce i autri criteries sciche per ejëmpl tan de ëura che dà ite surëdl y la distanza de 3,5 metri dal mur ce cësa.
Maestri amalei
La ulentà dl minister talian Brunetta de no ti paië dut l paiamënt a maestri ntan i prim 10 dis de malatia ne uelen tla provinzia de Bulsan nia respeté. “Tlo da nëus ne ons nia maestri che sta ora dl lëur dijan che i ie amalei, perchël ulons nce paië ora dut l paiamënt ti prim 10 dis de malatia” à sorissà Durnwalder. L suplemënt provinziel vën a Bulsan nterpretà sciche paiamënt de basa y possa perchël nce unì paia ora per i prim 10 dis de malatia. Sce tla provinzia de Bulsan possa nce unì paià ora i autri suplemënc, sciche chël de bilinguism, dëssa unì stlarì nchin ala senteda dl lunesc che vën.
Tituli y recunescimënt dla furmazion
L guviern provinziel à numinà na grupa de lëur per stlarì cun i organs de cumpetënza taliani y dl’Austria, ciun tituli de furmazion che possa unì recunesciui. Tl’Europa iel na lingia de criteries y tituli defrënc de furmazion, che fej pert de na frumazion per duta la vita, che stënta de unì recunesciui tlo da nëus. “Tl cajo dla furmazion di artejans son plu daujin al sistem tudësch, na forma che ne vën nianca piteda tl’autra pertes dla Talia” à dit l Presidënt dl Guviern provinziel. La grupa de lëur cun l presidënt dut. Georg Flora dëssa purté dant prupostes de soluzion.
Cumisseres per l ejam de bilinguism
La cuestion de sëurandé a d’autra istituzions i ejames de bilinguism, sciche damandà dala Union Europea, ne va a Roma nia inant. A una cun l Cumissariat dl Guviern, à la Jonta provinziela de Bulsan ncuei scrit ora n cuncors per curì i cumisseres de rujendeda taliana che à lascià. L se trata tlo de ncëries per i ani 2008-2010.
Aiuc umaniteres per l’Uganda
La Jonta provinziela de Bulsan à ncuei nciarià si presidënt de sotscrì na cunvenzion umanitera cun la region dl Gulu tl’Uganda. Bele dai ani iesen n cuntat cun chësta region per ti judé. “La cunvenzion vën fata per garantì aiuc te n tëmp de cin ani, per no fé me tei pruvedimënc singuli” à spiegà l presidënt Drunwalder. I aiuc che la Provinzia de Bulsan uel dé reverda dantaprima la furmazion prufesciunale, la sanità, l svilup dl lëur da paur y la furmazions de mëndri tuchei dala vieres. La cunvenzion che vëij dant aiuc per 600.000 Euro unirà sotscrida dai 15 al 17 de nuvëmber a Strassburg, n ucajon di dis europeics de svilupś.
Fé da nuef la patent
Truepa jënt dëssa vester jita te d’autra provinzies a fé da nuef la patent che ti ie unì tëuta. La Jonta provinziela ti ie jita do ala cuestion y sorissea che l ne ie nia vëira che tla Provinzia de Bulsan muessen aspité tan giut. Sëuraprò iel ncuei unì fat ora che l documënt de sanità muessa me unì scrì ora dal dutor de chemun, y nia plu n segondo iede da an cumiscion de dutores. Te d’autra provinzies ie la regulamentazions n pert mo plu sciorfes che tl Südtirol: do l terzo iede che l ie unì tëut la patent ne possela nia plu unì fata do. Chësc ne vel tl Südtirol nia.
Agenzia de mubilità
L Guviern provinziel de Bulsan à dat pro l statut dla agenzia nueva de mubilità. Chësc vëija dant 6 culaburadëures, y che l plann di culaburadëures, l program y l bilanz muessa avëi l bënsté dla Provinzia.
Nchin śën à la sozietà SI, na grupa dla SAD, fat i orars y truep lëures per l trasport publich tl Südtirol. Chësta ti à custà 3,3 milion de Euro. Cun l’agenzia de mubilità metuda su dala Provinzia se sparanien truep tëmp y custimënt.
Azion dla Brennercom
La Provinzia de Bulsan à vendù 10.252 azions dla sozietà Brennercom. Chësta cumpëida che fej ora l 25% dla sozietà , ie unida cumpreda dala sozietà "KM Invest GmbH" de Dispruch. Nce sce n à spënt la data, se à me nunzià chësta sëula sozietà per cumpré ju l’azions. “A vënder l’azions à la Provinzia davanià 4,3 milon de Euro” à spiegà Durnwalder. La Provinzia de Bulsan à do avëi vendù chësta azions, mo for l 44% dla Brennercom.
as
