Atualità
Nuzé l’ega dla plueia: cudejel
USP – Se nuzan dl’ega dla plueia possen sparanië truepa ega da bever y scioldi. Co che n possa nuzé l miec l’ega de plueia y co che n la mët da na pert, iel sën dal cialé do te n cudejel dat ora da esperc dl Ufize provinziel per stravardé l’eghes.
„La mudazions dl tlima purterà nce mudamënc tla cuantiteies de plueia y dla spartizion” nsci l assessëur Michl Laimer. Aldò de previjions nes aspieta tëmps cun truepa precipitazions y pona nce tëmps drët suc. Cun la truepa frabiches, ie nce desturbà l balanz danter plueies, ega che possa tré ju te fonz y eghes che regor ju per stredes, plazes o frabiches. L ie for plu ega che ne possa nia riesc tré ite te fonz y for plu ega che ne possa nia tanfé ora o tré ju te fonz. Per judé a purté a livel chësc balanz, dà l Ufize provinziel per stravardé l’eghes cunsëies tres n cudejel. Tlo possen nrescì co fé acioche l’ega de plueia ne regor nia demez, co nuzé l’ega de plueia y cie che la lege dij n chësc cont. “Te de plu chemuns iel udù dant che pra cëses nueves muessen avëi na zisterna per abiné su l’ega de plueia“ spiega l assessëur Laimer, sorissan che chësc ie de utl no me per l ambient, ma nce n cont de custimënt dl’ega per la families. “Ega de plueia ne ti costa nia ala families”, lecorda l’assessëur.
“L cudejel dat ora tla doi verscions, per tudësc y talian, vën chisc dis spartì ora ti chemuns, tla sareneres y juntà pro ala zaita la Provinzia „Das Land Südtirol“. Nteressei possa nce se damandé l cudejel diretamënter tl Ufize provinziel per stravardé l eghes. (Tel. 0471 411861; E-Mail: gewaesserschutz@provinz.bz.it; www.provinz.bz.it/gewaesserschutz).
as
