Atualità
A Puntives vëniel laurà inant, la streda resta sareda
USP – I lëures per seguré l parëi sëura l stradon de Gherdëina a Puntives va inant drët bën. L’ena passeda ie unì ju de majeri purons sun streda, sën iel bel unì rumà ju 700 metri cubich de material melsegur. L stradon de Gherdëina, riesc do Puntives de viers de Tluses, resta sarà y puderà bonamënter permò unì giaurì per l fin dl’ena.
Ncuei (19 de nuvëmber) ti cëla i geologhes dla Provinzia mo n iede plu avisa al parëi. Bele duta l’ena ie i culaburadëures dl Servisc provinziel per la stredes tl lëur de rumé ju sasc che manacia de tumé sun streda. Riesc dedora da Puntives se ova tla nuet dl ultimo vënderdi destacà sies metri cubich de sas de porfir. Doi metri cubich ie tumei sun streda. D’autri 400 metri cubich manaciova de tume ju. Per garantì segurëza à l assessëur Florian Mussner lascià saré la streda.
„Ntant ons bele rumà ju 700 metri cubich de material melsegur“ spiega Valter Molon, diretëur dl Servisc ala stredes tl raion Salten-Scilier. Sën iel mo debujën dl mené demez, dij Molon. La firma Karl Nocker de Urtijëi judà a rumé ju l parëi y la firma „Hob Snc“ de Puntives à fat unì ju l sac melsegures y à menà demez l material. Te chësta luegia uniral metù rëies acioche ne vënie nia ju sasc sun streda y fat su n col artifiziel per seguré la streda da sasc.
Mo ne iel nia mesun dì avisa canche la streda possa unì giaurida. L Servisc ala stredes fej cont de pudëi finé i lëures nchin n vënderdi per pudëi pona inò giaurì la streda. L muvimënt di auti vën ntant avisà sun la streda de Pruca o sun la streda che vën da Blumau a Ciastel y te Gherdëina.
as
