Atualità
Valivanza di dërc: sëurandà pesc’ per tesi
USP – A Bulsan iel ncuei unì sëurandat i pesc' per tesi sun argumënc che toca la valivanza di dërc danter ël y ëila. L prim pest à venciù Chiara Marcocci da Al Plan de Mareo che à scrit sun la mutilazion genitela dl’ëila.
Chiara Marcocci à finà via l studi tl Istitut universiter de Trënt per nterpréc y tradutëures cun la tesi “MFG: presente e passato”. L se trata de traduzions de lëures scientifics sun la mutilazion genitela dl’ëila. Tla prima pert de si lëur fej Marcocci n cheder l argumënt cumples la mutilazions jan ite sun la formes defrëntes, da ulà che les vën, l senificat, la cunseguënzes, la strategies de mudazions y cie che dij la lege n chësc cont. La segonda pert dl lëur dla diplomeda de Al Plan ie na traduzion dal tudësch al talian de n cheder storich tlo da nëus. L vën nce descrì co che tl 19esimo secul an purvà a varì amaledes psichics cun la mutilazion. La terza pert dla tesi ie na traduzion dal nglëisc al talian sun la situazion tl’Africa. Tlo vën la mutilazion permò pratigheda da 20 ani y uni popul à svilupà formes defrëntes.
La cumiscion à laudà l valor spezifich dl lëur de Chiara Marcocci y l avëi cris ora n argumënt zite. L prim pest ie nce unì sëurandat per se avëi dat ju cun n argumënt che toca de plën la valivanza di dërc danter ël y ëila, n particuler la cundizions dl’ëila te duc i ciamps dla vita. Tla cumiscion de sies persones, fovel nce Ingrid Runggaldier sciche reprejentanta ladina. L argumënt toca dantaprima persones da demez che vën nce a viver tlo da nëus, perchël ie la tematica mpomo daujin a nosta realtà.
L segondo pest à pudù pië do Graziella Marinello che per si studi de sociologia à scrit sun la discriminazion dl’ëila sun l marcià dl lëur. L assessëur provinziel per la valivanza di dërc, Francesco Comina à sëurandat a Brighitte Ganthaler l terzo pest. Ëila à scrit de sun la prostituzion sfurzeda y l lëur soziel per si studi dla scienzes dla furmazion.
as
Galaria dales fotografies
Foto USP/Pertl
