Atualità
N mëns ala giaurida dla zircunvalazion de S.Crestina
USP – Te n mëns, canche ai 16 de lugio uniral ufizialmënter giaurì la streda de zircunvalazion de S.Crestina scumëncia per si populazion n’era nueva. L muvimënt di auti unirà menà sun 1660 metri de streda nueva y tl zënter de S.Crestina miurerà dassënn la cualità de vita. A n mëns dala giaurida an bele scumencià a mëter ju l asfalt.
Duman mierculdi 17 de juni gëura inò l stradon de Gherdëina tl raion de Dorives ulache l ie unì fat adatamënc per arjonjer l puent che mëina tl tunel Saslong. Te chësc tunel iesen tl lëur de fé l mplant eletrich. Tl tunel plu lonch, chël de 434 metri iesen bele plu inant cun i lëures, tlo vëniel fat l tretuar. Cun l mëter ju asfalt scumëncia un di ultimi lëures per chësc gran proiet storich per Gherdëina.
La pert ufiziela dla giaurida sarà la juebia ai 16 de lugio domesdì (dala 17.00). Ntan l fin dl’ena uniral jit inant cun la Segra dl luech y la lies anjenierà da fé festa sun la vedla streda delibreda dal muvimënt pesoch.
as
