Atualità
Dai 9 de nuvëmber programs digitei tla Val Badia y Gherdëina
USP – Tla Val Badia y te Gherdëina saral dal 9 de nuvëmber da udëi la televijion digitela. La listes di programs de televijion y radio ie unides ufizialisedes. La cumpëida di programs da udëi y audì ti luesc ladins ne ie nia dlonch unfat.
La mudazion dla trasmiscion de televijion y radio scumëncia tla Provinzia de Bulsan ai 28 de utober tl raion de Bulsan. Do y do unirà la mudazion nce fata ti autri ot raions. Te Gherdëina y tla Val Badia uniral ai 9 de nuvëmber destudà la trasmiscion analoga y mpià la trasmiscion digitela.
Chi che à n decoder (ntegrà tla televijion o a pert) puderà abiné su na lingia de programs aldò de si posizion geografica. A Urtijëi saral danter radio y televijion 62 programs, a Corvara 36 y tl raion de Mareo 33. Tl Provinzia de Bulsan iel la sozietà RAS che se cruzià de mandé ora l signal di programs de rujeneda tudëscia. Sun si plata internet possen udëi la listes di programs per luech y frazion.
I tecnics dla stazions ie tl lëur de adaté l’antënes y ripetitëures acioche la mudazion dal analogh al digital possa unì a se l dé zënza de majera dificulteies. Tenian cont dla posizions scundudes de truep pitli luesc y frazions, ie n gran mpëni te dut Südtirol. Nce la families messerà adaté si televijion a cësa per chësta mudazion. Aldò dl’ultima nrescida dla RAS à bele trëi cherc dla families anjenià l decoder per pudëi udëi i programs digitei. Manco bona ne iela al mumënt pra la persones n pension, tlo iel permò 45% che ie anjeniedes per abiné su la televijion digitela.
De plu nfurmazions sun la mudazion dla trasmiscion televisiva ie nce da giapé tl internet sota www.provinz.bz.it/digitaltv y sota www.ras.bz.it ulache l ie nce la nfurmazions tla rujeneda ladina.
as
