Atualità
Durnwalder y Mussner sëurandà 20 cëses ai teremotei (cun audio)
USP – Na cësa per pudëi, tant che se lascia, ruvé de reviers a la normalita da uni di mo dan l inviern: chësc ie chël che l presidënt dla Provinzia Durnwalder y l assessëur ai lëures publics Florian Mussner ti à mbincià n mierculdi (21 utober) a passa mile persones tuchedes dal tremot ti Abruzzo. Tl luech Ocre, 12 chilometri da L’Aquila à i aministradëures sëurandat 20 cëses prefrabichedes dala Provinzia de Bulsan.
La Prutezion zevila de Stato cun si cumandant Guido Bertolaso à destinà l luech Ocre ala Provinzia de Bulsan per judé a fé su cëses. Tla frazion San Felice y San Panfilo iel unì fat su 20 cëses prefrabichedes che pieta da viver a 72 persones. L ti vën metù a desposizion cuatieres da doi, da cater y da sies persones che sarà anjeniei nchin te n’ena. L ie mpurtant che i zitadins de Ocre possa viver inant te si luech y ne muessa nia jì se n jì, nsci l pensier de Durnwalder pera la sëurandata dla cëses al chemun de Ocre.
La Provinzia cun si tecnics y la firmes à fat dut l puscibl per fé su la cëses tan riesc che la va a na maniera che la jënt ne muessa nia viver plu giut tla tendes. L tremot fova stat ai 6 de auril de chësc ann. La cëses ie dutes de categuria “Cësa tlima B” y tol ite de ndut na spersa de 1270 metri cuadrac y na cubatura de 4440 metri cubich. Les unirà dutes mubiliedes de fin. La Provinzia à nciarià la firmes Unionbau per fé la cëses y la firma Jungmann per la mubilia. Sëuraprò ala 20 cëses à la Provinzia metù a desposizion la basa de peton per mo d’autra 11 cëses che ie unides fates su dala Prutezion zevila de Stato. De ndut iel unì spendù ite 2,5 milion de Euro per aiuc ala persones tuchedes dal tremot.
L assessëur Mussner à pra la sëurandata tl Abruzzo spiegà che la nfrastrutures ie unides fates dai tecnics dl Servisc provinziel per la stredes. Na desëina de ëi à laurà te turni da 15 dis, de ndut 110 dis fajan 1300 ëura, lauran nce inant ora de ëura sciche ulenteres. I lauranc à fat spusté 35.000 cubich de tiera y metù ju trëi chilometri de cabli. “L lëur ie stat drët mpeniatif, chësc nce ajache i raions che nes ie unic sëurandai a San Panfilo ie sota defendura archeologica y chëi de San Felice ie te na posizion de pendënza” à dit Mussner. Ël à nce sorissà l gran lëur di proietanc “Ëi à messù lauré ora i proiec te puech tëmp y chësc cun me puecia nfurmazions”.
L fé su dla cëses a na maniera tan efizienta y plu abenëura che proietà ie stat mesun tres la bona ulentà y culaburazion dl Chemun de Ocre, la populazion che ti à dat da maië y durmì ai lauranc, y la firmes che à laurà cun flessibltà y debota. L ambolt Gianmatteo Riocci à rengrazià per la bona cualità dla cëses: ël à udù n grumon de cëses prefrabichedes, chëles che vën metudes a desposizion dala Provinzia de Bulsan ie dla miëura cualità, al dit.
as
Galaria dales fotografies
Durnwalder y Mussner sëurandà 20 cëses ai teremotei
Mussner: culaburazion tla prutezion zevila
Mussner do la sëurandata de 20 cëses ai teremotei dl Abruzzo
- Scarica il file audio 192 kb
