Atualità
L’assessëur Mussner anconta la Jonta dl Chemun de Urtijëi
USP – “Mparé a se cunëscer miec per na bona culaburazion” – sota chësc moto à l assessëur provinziel Florian Mussner da permò ancuntà la nueva jonta dl Chemun de Urtijëi. Riesc do la prejentazion di assessëures nueves dl majer luech ladin, à l assessëur provinziel stlarì custions de mpurtanza per Urtijëi che reverda la frabiches, stredes, scoles y la cultura ladina.
I cumëmbri dla nueva Jonta dl Chemun de Urtijëi à pra l’ancunteda cun Florian Mussner riesc metù sun mëisa cuestions che n se à tëut dant de realisé y la puscibltà de giapé n aiut dala Provinzia. Per l ressanamënt dla vedla scola elementera a Urtijëi iel unì rujenà de n cuntribut finanziel. N cont dl ressanamënt y ngrandimënt dla scola mesana à l assessëur Mussner spiegà l bujën de n proiet esecutif da ti prejenté ala cumiscion tecnica provinziela. N cont de slargë la streda de zircunvalazion pra doi puenc ie unì udù dant de fé n’ancunteda cun i respunsabli. La Jonta de Urtijëi ulëssa nce fé n puent per ruvé permez plu saurì al raion artejanel, tlo iel unì ora che l sarà debujen de n finanziamënt particuler. Danter la cuestions cultureles iel nce unì tratà l Ciastel Stetteneck per chël che l fossa na puscibltà de giape n cuntribut dala Region. Do n barat de ideies y vijions sun de plu cuestions sciche nce la streda dala rodes, l finanziamënt per la mubilia dla utia de Resciesa y l cunsëi dl Istitut culturel ladin, iel unì rujenà de problems a livel de valeda. L assessëur Florian Mussner à da si pert prejentà la situazion atuela n cont dl scrì ora lëures publics.
as
