Atualità
Sci dla Jonta provinziela per cumedé la streda da S.Martin a Lungiarü
USP – La Jonta provinziela à te si senteda da ncuei (17 agost) dat pro l finanziamënt per slargë y splané la streda provinziela danter S.Martin de Tor y Lungiarü. La proietazion fova bele unida fata dan n valgun ani sun la basa de vedli priejes. Sun pruposta dl assessëur Florian Mussner à la Jonta provinziela dat pro l custimënt nuef de ndut 925.959 euro, proietà aldò dla tarifes atueles.
La streda per ruvé a Lungiarü mesura 4 metri de larghëza y canche n auto se anconta cun n camion o n majer mesun iel gran deficulteies a passé via. L Ufize provinziel per frabiché stredes ova laurà ora n proiet per slargë y splané la streda danter l chilometer 4,0 nchin 5,5. “L bujën de miuré la streda de Lungiarü ons bele udù da n struf, ncuei ons purtà inant l finanziamënt, che ie n var essenziel per puëi fé chisc lëures” spiega l assessëur Florian Mussner.
L custimënt proietà dl 2006 udova dant n custimënt de ndut de 795.000 euro. Aldò dla tarifes nueves à la Jonta provinziela dat pro l custimënt nuef de 925.959 euro che fej ora n aumënt de 16,5%.
La trassa dla streda dëssa aldò dl proiet resté bëndebò la medema sciche śën. Aldò dla cundizions geologiches uniral slargià la streda da pert de mont o de val. De plu lerch iel dantaprima debujën tla raides. Aldò dla diretives provinzieles ie la doi corsies unides proietedes sun na larghëza de 2,5 metri cun leprò mez meter de ëur de streda. La streda de Lungiarü arà te si pont plu ërt na pendënza de 10%. L raion danter S. Martin y Lungiarü se damanda me te puecia lueges mures de fundamënta per la streda.
as
