Atualità
Durnwalder tl Kamchatka: cooperazion turistica y de furmazion
USP – Sun si viac tl Kamchatka, tla Siberia, à l presidënt dla provinzia Luis Durnwalder abù si prima ancuntedes istituzioneles: cun l aministradëur dla region russa al nvià via i prim vares per mëter n drova n’acurdanza de cooperazion te de plu ciamps sciche l cumerz, cultura, furmazion, sport y turism, che fova unida sotscrita de nuvëmber a Mosca.
“Ulon arjonjer l svilup de cuntac danter firmes y categuries economiches de nosta doi regions – à dit Durnwalder tla capitela Petropavlosk – ma nce l mëter a jì deberieda manifestazions, nvië via barac danter la strutures cultureles y danter i istituc de nrescida.” Cun l guvernadëur Alexey Kuzmitskyi à Durnwalder rujenà dl savëi che la provinzia de Bulsan possa seguré tla realisazion de raions dai schi proietedes tla region siberiana.
Just tl ciamp turistich se an tëut dant de crëscer n cont de tecnologia alpina y marketing de sport da inviern cun aiut dl savëi che vën dala provinzia de Bulsan. Cun l minister dla promozion economica, anda Gerasimova, à Durnwalder rujenà dl proiet per n zënter modern dal biathlon tl Kamchatka. “Te chësc cajo possa la provinzia de Bulsan dessegur dé n cuntribut tecnich de livel aut stizà sun l’esperienza te Antholz” à dit l presidënt.
Kuzmitskyi à prejentà la pruspetives dla region siberiana Kamchatka unida a se l dé tres la fujion de doi provinzies de juni 2007. A d’ël ti à Durnwalder purtà n casco dl atlet Peter Fill, che l ova mparà a cunëscer tl Südtirol. Ntan i prim dis de si viac, à l presidënt Durnwalder ancuntà reprejentanc dl turism y à rujenà dla furmazion dl personal spezialisà per chësc ciamp. “N cont de furmazion possel unì metù a jì na culaburazion de valor da pert dl Università de Bulsan y dl’Eurac” à detlarà Durnwalder, prejentan l’atività de chësta doi istituzions academiches. Argumënc tratei ie nce stai l sparanië de energia y l potenzial dl model “Cësa Tlima” (tl Kamchatka iel na temperatura media de 5 gradi). L viac de Luis Durnwalder jirà inant tla region dl Altai, sun la sëida cun la Cina, l Kazakistan y la Mongolia.
as
