Atualità
Durnwalder de reviers dala Ruscia: cooperazion de economia y energia
USP – Doi regions tl’est dla Ruscia fova sun l program de viac dl presidënt dla Provinzia Durnwalder ntan na curta ena. Do l’ancuntedes tla region dl Kamtschatka ie Durnwalder furnà tla region sibirica dl Altai ulache la se tratova de proiec cuncrec de culaburazion tl turism, agricultura, energia y ambient.
L’ena passeda ie l presidënt dla provinzia stat gest tla region dl Kamtschatka cun chëla che la Provinzia de Bulsan à de nuvëmber dl ann passà fat n’acurdanza de partner y che la se tratova śën de mëter n drova. (cëla comunicat dl 26 agost)
Da Petropawlowsk ie l presidënt furnà a Barnaul, la capitela dla region Altai tl raion de sëida cun l Kasachstan, la Mongolia y la China. Cun l guvernadëur Alexander Karlin à Drunwalder sotscrì n’autra acurdanza. “Tla culaburazion cun l Altai sons te vel ciamps nchinamei plu inant permez al Kamtschatka" à dit l presidënt fajan referimënt al barat economich. “Ntan l’ultima enes iel ncëries per n valor de 15 milions de euro jites a firmes de tecnologia alpina dl Südtirol y speron che l ne vën mo do d’autres” à dit Durnwalder.
La tecnologia alpina cun l frabiché mplanc portamont ie nce na seva mpurtanta dla culaburazion tl ciamp turistich. “Sëuraprò ulons mëter a desposizion programs de furmazion” à dit l presidënt dla Provinzia. N’autra seva dla cooperazion ie l’agricultura. “Davia che tl Altai vëniel fat su cultivazions de versura y ua da vin, iel gran nteres al savëi de nosta istituzions, sciche l zënter de sperimentazion Laimburg” spiega Durnwalder. Na terza seva ie l’energia. “Nce te chësc cajo se tratel de savëi tl ciamp dl’energia alternativa y Cësa tlima” à dit l presidënt juntan che tl Altai an nce nteres ai programs per defënder l ambient, sciche la gestion dl refudam.
as
