Frabiché | 02.09.2010 | 11:10

Vijita al cantier dl spedel nuef a Bulsan: i lëures va inant drët bën

USP – I lëures a Bulsan per l spedel nuef de 255.000 metri cubich cun n custimënt de 237 milion de euro va inant drët bën. Per l 2015 fejen cont de finé de frabiché. Chësc ie l bilanz dla vijita dl presidënt la provinzia Luis Durnwalder cun i assessëures Florian Mussner, Richard Theiner y Christian Tommasini, inier prim de setëmber.

Nchin dl 2025 se an tëut dant de adaté l spedel de Bulsan ai standard modernes n cont de tecnologia y banies. L dëssa unì adatà ai bujëns di pazienc y dl personal garantian la miëura funzionalità y flessibilità. L custimënt udù dant per ngrandì l spedel de Bulsan y arjonjer de ndut 1,255 milion de metri cubich ie de 648 milion de euro.

“Sce n ie amalei, se damanden na bona assistënza a n livel modern de medejina y tecnica, strutures al var di tëmps cun personal espert: de chësc viers vëniel frabicà l spedel a Bulsan” à dit l presidënt dla provinzia Durnwalder. L vën fat de majeri nvestimënc ti servijes, per na miëur cualità y na miëura furmazion dl personal. “L ie mpurtant fé ncuei programs y strutures, per pudëi duman pité la miëur assistënza ai zitadins. Ne ulon nia fé debic per la generazion che vën do, ma ulon nuzé l miec i scioldi che on a desposizion” à dit l Presidënt dla Provinzia.

“L daunì se stiza sun la sanità y de bon servijes, perchël adatons śën l spedel de Bulsan ai bujëns dla medejina moderna, di pazienc y dl personal. Chëśc do avëi bele fat lëures pra i spedei ti autri luesc dla provinzia” à detlarà l assessëur ai lëures publics Florian Mussner. Dl spedel de Bulsan prufitea n grum. “Chësc ie tan grant sciche n luech y ne cumporta nia me vantajes de sanità ma nce per l’economia” à dit l assessëur. Me ntan chësc ann à l dipartimënt ai lëures publics dat ncëries per n valor de 115 milion de euro, à dit Mussner.

Nce chëst ann iel stat mesun giapé da Roma 47 milion de euro de finanziamënt straurdiner per l spedel de Bulsan. “La provinzia de Bulsan ie a livel naziunel danora n cont de proietazion y realisazion de programs per strutures de sanità” à dit l assessëur ala sanità Theiner. Nce tla sanità ie i scioldi a desposizion limitei, perchël muessi unì adurvei cun fundamënt y perchël iel nce debujën de na reforma tlinica – nsci Theiner.

Pra l spedel de Bulsan vëniel frabicà n toch al iede ntan che va inant l’atività dl spedel nstës. La garasc sota tiera y i locai da se tré ntëur per 3400 dependënc, cun l canal di media ie bele finei. L pont zentrel dla prima pert di lëures ie la tlinica, tlo vëniel iust frabicà. Tl toch nuef cun cin partimënc sëura tiera y doi sota tiera uniral metù la repartizions plu mpurtantes sciche l poliambulatuere, l prim aiut, la Radiodiagnostica, la repartizion per uperazions, la stazion ntensiva, la cardiologia y la majons per pazienc de chirurgia. Sëuraprò saral nce lerch per servijes ai pazienc y vijitadëures che reverda banca, posta, butëiga y ustaria. Sun l tët uniral anjenià la lerch per de sëura cun l joler.

L proiet de Astrid Tiemann-Petri vën frabicà dala firmes “Consorzio cooperative Costruzioni“ y „ZH General Construction Company AG“. N fej cont de finé la frabica de 255.000 cubich per n custimënt de 237milion de euro per l ann 2015. Ti ani 2012 nchin 2017 iel prugramà de renuvé la majons dal cuarto nchin al otavo partimënt dl vedl toch de spedel. Dal 2017 inant uelen mo fé ressanamënc dl vedl toch de spedel.

as

Galaria dales fotografies

I lëures pra l spedel de Bulsan va inant drët bën: i cumëmbri dla Jonta provinziela Mussner, Durnwalder y Theiner sun l tët dl spedel;