Atualità
Lëures sun Resciesa, tl parch naturel Puez-Odles
USP – L troi che porta al Christ de Resciesa ne vën nia ngrandì ma me cumedà ca sun ncëria dl Ufize provinziel per i parcs naturei. Che la ie nscila à inier (prim setëmber) nce cunstatà reprejentanc di chemuns y dla lies naturalistiches. La vijita ai lëures ie unida metuda a jì do usservazions ai lëures cun l festide che l unissa fat na streda dainora.
Pra l sëuraluech sun Resciesa fovel cun i reprejentanc dl Ufize per i parcs naturei nce i ambolc de Urtijëi y Funes, reprejentanc dla Lia da Mont de Gherdëina, dla Lia Natura y Usanzes y la lia provinziela “Heimpatpflegeverband”. L ti ie unì cialà ai lëures pra l troi nr. 31 sun l ëur de Resciesa Dedora danter la capela y l christ. Tlo fovel unì fat speculazions che l troi unissa ngrandì, n festide che ie śën sfantà defin. ”A lëures finei, sarà l troi 80 cm plu lerch y jirà inant da chël toch che fova bele unì cumedà dan ani” spiega Egon Trocker, che mëina la grupa de lëur dl Ufize parcs naturei y dl Ispetorat dla Furestela de Persenon.
Trocker à spiegà che deberieda cun chisc lëures iel nce unì mplenì su 700 metri dl l vedl troi aut ite, l fajan crëscer ite. Chisc lëures fej pert de n cunzet a chël che l Ufize provinziel ti stà bele do da ani. La se trata de tenì la jënt ti troies y de stlù su i troies che se fej da na pert ora per stravardé la flora.
Cumedan ca i troies de Resciesa cëlen de ti vester a n majer problem. “Per via dla particularità dl raion crëscel puecia ierba y na plea tla veja cumporta che la tiera vën slavateda demez” spiega Enrico Brutti, vizediretëur dl Ufize parcs naturei. Per stravardé la mont da erojion iel deberieda cun la Forestela unì nvià via n program de plu ani. Nchinamò iel unì fat nvestimënc per 300.000 euro - à dit Brutti.
I lëures sun Resciesa ie unic laudei dai ambolc. Ewald Moroder à sorissà che l Chemun de Urtijëi sustën chisc lëures de ressanamënt ajache i ie de mpurtanza per mantenì Resciesa. L ambolt de Funes Robert Messner, nstës presidënt dl cunsëi de gestion dl Parch naturel Puez-Odles, à sorissà che i lëures i unic dai pro dla cunsëi dl parch y che i vën fai tan bën da vester da ejëmpl.
as
