Atualità
Giaurì la terza oasa dl chiet a La Val
USP – Pra i Bagn Rumestluns a La Val iel unì giaurì la terza de n dut nuef raions de paussa pra funtanes dal’ega minerela. L fin ie chël de tenì mpe la cultura di vedli banies di paures che al scumenciamënt dl secul passa ova abù n tëmp de gran suzes nce sëura la sëides provinzieles ora.
La funtana dal’ega minerela di Bagn Rumestluns ie daujin ala ustaria Al Bagn ulache tla generazion passeda univel mo pità ega da solper per curé de plu mei. Abiné su chëst’ega ne ie nia stat saurì. “N à inò udù che l’ega se chier si streda” dij Wilfried Rauter, diretëur dl ufize provinziel per l’eghes.
N sada passeda à l assessëur Michl Laimer giaurì l raion de paussa di Bagn Rumestluns, che ie la terza oasa dal chiet do i banies Tauferer a Tscherms y Überwasser te Ulten. L’idea de anjenië ca la funtanes acioche plu jënt ti ruva permez y possa les nuzé miec fova unida su l ann 2007. N ann do oven nvià via i lëures. Cun l pië su da nuef dl’ega y cun droc nueves per pudëi bever plu saurì vëniel tenì n vita chësta funtanes.
I Bagn Rumestluns ie unic nuzei l prim iede l ann 1793. L’ega da solper univa adurveda per curé rheuma, problemes ala pel y per giapé inò apetit. Per cënc ani iel stat n bani drët damandà dai paures ladins. Danter i ghesć da oradecà iel nce stat l phisich de atomesc Max Planck, premià cun l pest Nobel.
as
Galaria dales fotografies
