Atualità
Mussner mantën i cuntac cun i ambolc dla Val Badia y Gherdëina
USP – Al barat de esperienzes y al mantenimënt di cuntac danter aministrazions chemuneles y la Jonta provinziela ie unì dedicà l’ancunteda dl assessëur Mussner cun i ambolc dla Val Badia y de Gherdëina.
L assessëur provinziel ladin à ulù pité na ucajion nia ufiziela ulache ambolc nueves y ambolc da dant possa sté deberieda per n cunfront y barat de ideies. Truepa ativiteies y problematiches dl’aministrazion publica à n cunliamënt danter Provinzia y chemuns, perchël an ulù se ancunté per mantenì chisc cuntac nce cun i ambolc nueves. Pra l’ancunteda dl 7 de setëmber sun Jëuf de Frea à l assessëur Florian Mussner auzà ora la mpurtanza dl’autonomia di chemuns y dla bona culaburazion cun la Provinzia, che n à daniëura abù tla valedes ladines.
Do la mudazion de ambolc te de plu chemuns à l assessëur nce nvià chëi da dant per i rengrazië dl gran lëur y mpëni che i à purtà per l svilup soziel, culturel y economich di luesc ladins. “L ie resultac che n possa mustré su cun gran legrëza. Chësc lëur ne possa nia unì desmincià. Perchël prei bel i ambolc da dant de ulëi dé inant si esperienzes al’aministrazions nueves” à dit Mussner.
Mbincian truepa legrëza y pascion ai ambolc per si ncëria, à Mussner metù a cuer che nce sce l lëur ne ie nia for tan saurì, dëssa l bën dla cumenanza y l svilup sann dl raion for vester tl zënter politich. L assessëur provinziel ladin à detlarà de vester gën a desposizion per traté d’uni sort de tematiches y che ala fin de uni mëns tëniel udienzes tla valedes ladines per la populazion y nce per i aministradëures.
as
