Atualità
Jonta provinziela à dat pro l cunsëi nuef dl Istitut Culturel
USP – L Istitut Culturel Ladin Micurà de Rü à n cunsëi de istitut nuef. La Jonta provinziela à te si senteda da ncuei (27 setëmber) dat pro l Cunsëi de Istitut tenian cont dla prupostes dla lies cultureles y di chemuns dla Val Badia y de Gherdëina.
L cunsëi de istitut cumpëida 11 persones danter reprejentanc de istituzions, aministrazions y lies cultureles. Do la veles de chemun à la Jonta provinziela ncuei numinà l cunsëi nuef ti dajan la ncëria per cin ani.
Albert Videsott ie unì cherdà a reprejenté la Jonta provinziela tl cunsëi dl Istitut culturel ladin. Ël ie diretëur dla scoles autes a La Ila. Cater ie i reprejentanc dla lies cultureles: Erica Castlunger y Tone Gasser per la Val Badia deberieda cun Marina Demetz y Bruno Senoner per Gherdëina. Danter chisc cater ie Marina Demetz de Urtijëi nueva te cunsëi. I ambolc de Gherdëina vën per l prim iede reprejentei da Lara Moroder Oberkofler che ie assessëura a Urtijëi. I cin ambolc dla Val Badia vën reprejentei da Jaco Frenademez, ambolt de Badia. Sciche ti ani passei ie nce l ntendënt dla scoles ladines Roland Verra y l diretëur dl Istitut pedagogich Theodor Rifesser unic numinei tl cunsëi nuef. L diretëur dl Istitut culturel Leander Moroder cun l secreter ne a nia l dërt de dé ju la stima.
L presidënt dl cunsëi de istitut unirà lità tla senteda costituënta, la data unirà mo fata ora. L presidënt da dant Hugo Valentin ne se à nia plu metù a desposizion per chësta ncëria.
as
