Atualità
Stradon plu lerch pra l puent Setil a Urtijëi
USP – L stradon a Urtijëi vën slargià al’autëza dl puent de Setil a na maniera che i auti possa raidé ite sun l puent zënza mpifé l muvimënt sun stradon. Chësc ntervënt dl Servisc provinziel per la stredes à l fin de miuré l muvimënt sun l stradon de Gherdëina ntan la sajons autes. N fej cont de finé i lëures per la fin de nuvëmber.
L lëures che à da permò scumencià a Urtijëi reverda l stradon de Gherdëina danter l tunel de Petlin y l puent dl Baga (Cosmea). L stradon vën slargià a na maniera da pudëi raidé ite sun l puent de Setil zënza mpifé l muvimënt. L muvimënt de valeda possa ntant passé sun na terza corsia. Chësta terza corsia vën dl’auter vieres nuzeda per chëi che furnea da punet sun stradon.
“Cun chësc ntervënt ulons miuré la viabltà sun l stradon ntan la majera pert dl ann, scebën che per i dis de majer muvimënt ne basterà chësta corsies nia” spiega l assessëur Florian Mussner. Per chëi che va a pe vëniel nce fat da nuef y ngrandì l tretuar sun l puent de Setil.
L stradon de Gherdëina unirà nce slargià pra l puent dl Baga per fé lerch a na stazion dala curieres. La jënt puderà zape ite y ora dla curieres sun na luegia a posta, de zes dal muvimënt di auti. Per chësta stazion dla curieres uniral fat n mur de sas da ruf su.
Deberieda cun chisc doi lëures prinzipei vëniel nce fat de mëndra cumedures, sciche l dlander de streda y l’ëur de streda sun duta la lunghëza danter l tunel de Petlin y l puent dl Baga. Per duc chisc lëures ie unì dant na ncëira per 180.000 Euro.
Per via dl muvimënt sun streda d’autonn an deberieda cun i chemuns de Urtijëi y Ciastel ulù aspité la fin de setëmber per scumencé cun i lëures. Canche l unirà fat l mur tl raion Cosmea saral debujen de semafer. Aldò che l tëmp lascia lauré, fejen cont de finé i lëures per la fin de nuvëmber.
as
