Atualità
Senteda dla Jonta provinziela dl 04 utober
USP – La partizion dl bilanz provinziel y la reforma tlinica ie stai i argumënc cun chëi che la Jonta provinziela se à dat ju prinzipalmënter te si senteda da ncuei, 04 de utober. I argumënc de majer nteres à l Presidënt dla Provinzia prejentà riesc do la senteda te cunferënza stampa.
Reforma tlinica
La Jonta provinziela à dat pro si prupostes cuncretes co che dëssa unì mpartì i servijes danter i spedei dla provinzia. “Nsci sciche uni mpreja, muessa nce l servisc de sanità se adaté ala nueva pusciblteies dl tëmp” à dit Durnwalder. Per mantenì n livel aut dl servisc ai zitadins che à debujën de cures ne iel nia plu mesun tenì duc i servijes te duc i spedei. Ma duc i spedei dla provinzia resterà n funzion cun si servisc de basa. Tl cajo de n servisc per parturì se damanda la Jonta amanco 300 nascites al ann per garantì l finanziamënt. Chësta cumpëida vën arjonta te majera pert di spedei, ma nia a San Ciana/Innichen. “Sce i chemuns ie dla minonga che l dëssa mpò unì mantenì chësc servisc, dëssa ëi paië la defrënza per ruvé al livel dla 300 nascites” à detlarà l presidënt Durnwalder.
Nce ti mëndri spedei uniral metù n servisc spezialistich per adurvé duc i liec che ie a desposizion. Ciun servijes spezialistics che unirà metui te ciun spedei unirà prejentei duman (5 utober) te na cunferënza stampa a pert.
Bilanz provinziel 2011
I assessëures à marciadà la spartizion dl bilanz de previjion per l ann 2011. La soma a desposizion per l ann che vën sarà de 5.226 milion de euro, 1,11% (58,6 milion) de manco permez al ann dant. Aumënc iel dantaldut tl capitul dl soziel y sanità, trasporc y istruzion. Prinzipalmënter iel te majera pert di capitul debujën de smëndrì l finanziamënt de 6%. “Nce sce l ie da sparanië, se merita la families, soziel y sanità mpomo n aumënt de 2,6% permez al ann passà” à dit Durnwalder, fajan referimënt che tlo vëniel udù dant feter 1,59 miliardes. N aumënt de 16,7% iel nce udù dant per l trasport publich. Mpede dé truep cuntribuc iel nce udù dant 15 milion pe l fond de rotazion, da chël che l vën mprestà scioldi a bon priesc. La spartizion y bilanz y la lege finanziera unirà l’ena che vën trateda mo n iede per ruvé al’apruvazion.
Lege finanziera
La Jonta provinziela à tëut demez la njonta IRPEF per la prima categuria de davani. Do lege pudëssen raté nchin a 1,4% de njonta de chëuta sun l davani di singuli zitadins. La njonta provinziela ie da nëus de 0,9%. Chësta tumerà demez per la categuria de davani nchin a 15.000 euro netto al ann. Per 93.000 persones fej chësc ora n sparani de 135 Euro de chëuta. Per la cassa provinziela se gëura n busc de 8 milion de euro. Chësc busc unirà curì cun n aumënt dla chëuta IRAP per banches y segurazion che vën auzeda da 3,4% a 4,82%. La pruposta trateda te Jonta provinziela vëija nce dant che a vënder n auto, giapen de reviers la chëuta sun l auto sce n à mo amanco 4 mënsc paiei ite. Per l internet debota uel i assessëures fé 15 milion de nvestimënc. Chësc dëssa unì curì vendan azions dla Brennercom.
Per mantenì l pat de stabilità muessa la Provinzia sparanië 50 milion de euro, i chemuns 15 milion y istituzions provinzieles 4,7 milion.
I cuntrac coletives dëssa unì auzei de 0,6% permez al 2009. L Stat ne lascia nia pro che l vën auzà i paiamënc, conta chësta normativa à la Jonta provinziela fat recurs.
Plazes dai auti
L priesc per lascé l auto pra l spedel de Bulsan o pra istituzions provinzieles ie giut stat argumënt de descuscion. La Jonta provinziela à śën metù 1,20 euro al ëura per lascé l auto te garasc. Per lascé l auto sun na plaza iel me da paië mez l priesc, 0,60 Euro al’ëura. L priesc dla luegia per l auto vën calculà cun la prim ëura plëina y pona mes’ ëura al iede. L’ezezions sciche per ejëmpl per ulenteres resta zënza mudazions.
Plaza Magnago
La plaza dan ala cëses dl Cunsëi provinziel y la Jonta provinziela a Bulsan dëssa unì numineda do Silvius Magnago. Nce sce do lege dëssel passé 10 ani do la mort dan numiné na luegia publica do na persona, dëssel aldò de Durnwalder te chësc cajo unì fat n’ezezion. “Silvius Magnago se à fat gran meric y à nce na gran azetanza da pert dla populazion”, nsci l’argumentazion di assessëures.
Stritoz tofles di troies
La Jonta provinziela uel numiné si reprejentanc tla cumiscion per la tofles di troies da mont aldò de chëi che reprejentea l Stat. “Sce la se trata de tecnics, ulons nce nëus mëter tecnics, sce la se trata de prufessëures o politics, fajerons nëus l medemo” à detlarà l presidënt Durnwalder. Davia che l Stat ne à mo nia tëut na dezijion, ie nce chësc pont unì spënt al’ena che vën.
Servisc per i media
L Ufize stampa dla Provinzia ie unì spartì te doi servijes. Per l servisc journalistich ie Monika Pichler unida nciarieda a sëurantò la coordinazion. Paolo Ferrari y Christian Rainer, nchin śën a cë dl ufize, se cruzierà de na comunicazion de relazions publiches per la Jonta provinziela che ti va plu sot ai majeri argumënc.
as
