Atualità
Pruposta de realisazion dla reforma tlinica: servisc sëura dut y de bon livel
USP – Tenì aut l livel te na mesura che se lascia nce finanzië tl daunì y mantenì i 7 spedei dla provinzia, dut chësc zënza smëndrì dassënn l servisc ma nuzan miec cooperazions y zëntri de cumpetënza. Chësc ie la basa de descuscion prejenteda ncuei (5 utober) a Bulsan dal assessëur de cumpetënza Richard Theiner deberieda cun i respunsabli dl’Azienda sanitera provinziela. “Lauron sun n’assistënza sun dut l raion tenian l livel nternaziunel, chësc documënt ie na basa de descuscion” à spiegà Theiner.
L documënt prejentà a Bulsan ie l resultat de n lëur de 26 esperc dla cumiscion tlinica data pro ala fin de juni cun duc a una. “Nrescides testemunieia che l servisc de sanità a n standard aut, nsci Theiner, ma l svilup dl ciamp se damanda ntervënc de reorganisazion per garantì la miëur assistënza per duc i zitadins che ie nce mesun finanzië te n tëmp plu lonch”.
Duc i 7 spedei resta davierc y vën trai pea dala reforma. N ne uel nia śaré ma nvië via cooperazions y nuzé miec la potenzialità dla strutures che ie unides fates su ti ultimi ani. “L ne se lascia nia plu finanzië n servisc che pieta dlonch dut, l ie debujen de culaburazion y spezialsazion” à dit Theiner, juntan che l documënt da ncuei ie la prima basa, śën scumëncia la descuscion ulache n se aspieta prupostes costrutives dan che la Jonta provinziela tole na dezijion finela. N fej cont de ruvé mo d’autonn a chësta dezijion.
L diretëur dl’agenzia sanitera provinziela Andreas Fabi à metù a cuer che per pudëi finanzië l sistem tl daunì y mantenì n livel aut, muessen se adaté ai custimënc. Per l ann 2011 muessen fé cont de ne giapé plu degun scioldi da Roma. Fabi à lecurdà che la va de tenì cont dla realtà sciche i tëmps massa lonc che la jënt resta te spedel, i drë servijes, l debujën de valorisé l raion, la nueva diretives europees y la regulamentazion nueva n cont de orar de lëur.
La reorganisazion se urientea sun de plu ponc: 50% di servijes saniteres muessa, do standard europeich unì pitei ora di spedei; l ie debujën de na reorganisazion flessibla di turni, la furmazion y l spustamënt dl personal (al mumënt feter 9.000 dependënc); culaburazion cun strutures privates, tenì l cuntrol di custimënc nce sce sun na sëula unità sanitera iesen bel stai boni de smendrì l aumënt da ann a ann dal 8% al 3-4%, per l daunì uelen smendrì servijes dopli y miuré la cunzentrazion de savëi te spezialisazions.
L program de reforma ie fat su sun n sistem de assistënza cun trëi spedei de basa (Sterzing, San Ciana/Innichen y Schlanders), trëi spedei aziendei (Maran, Persenon y Burnech) y n spedel zentrela Bulsan. Uni una cun servijes spezifics. Tenian cont che i spedei de basa tol su pazienc de prëscia, uniral nvià via na culaburazion danter la repartizions. L’assistënza per tumores unirà strutureda da nuef per duc i 7 spedei, metan servijes spezialisei te la lueges defrëntes. Da nuef uelen nce mëter a jì la culaburazion dla comuniteies de raion cun acurdanzes de ublianza. Na forma urganisativa nueva ie nce unì pensà per la pediatries y ginecologies, che piterà si servijes dantaldut tla forma ambulatoria y via per l di. L stazions da parturì vën dal ann 2011 mantenines sce l ie almanco 300 nascites al ann.
La basa de descuscion sun la reforma tlinica cun la pruposta de mudazions tla repartizions di set spedei dla provinzia de Bulsan ie publicheda tl internet sot a www.asdaa.it/it/riforma-clinica.asp
as
