Atualità
Barat Stat – Provinzia: lëures tla puscions dla casermes
USP – Cuatieres sun raions dla casermes: l barat che ie unì marciadà danter Provinzia y Stat unirà a se l dé te sies fases, doves ie bele tl lëur. “Te tëmp de sies ani ulons avëi stlut ju duc i lëures y avëi sëurantëut la puscions che on fat ora” nsci l presidënt dla Provinzia Durnwalder. N ie tl lëur de scrì ora i lëures tla caserma de Corvara.
Dan che l barat possa unì a se l dé, muessel unì fat na lingia de pruvedimënc da pert dl dipartimënt provinziel per lëures publics y avëi. L valor dla puscions de casermes che ne vën nia plu adurvedes ie unì sciazà y nscì iel unì prugramà cie che l unirà cumedà ca y frabicà. “Cun l minister ons fat ora che la Provinzia anjinia cuatieres per i saudeies sun i raions de casermes fajan ressanamënc o cuatieres nueves.” à dit Durnwalder.
Te chëla che l Stato zed i vedli raions de casermes ala Provinzia, ie la repartizion per aministrazion dl avëi dl assessëur Florian Mussner a pië do chësta puscions. Aldò dla prima acurdanza se tratel dla caserma Verdone a Vahrn, Mercanti a Eppan y Schenoni a Persenon. La segonda acurdanza reverda la majera puscion dla caserma Rossi a Maran y la Reatto a Persenon. “Chësta puscion ie suvënz tla miëura posizion ti zëntri” spiega Mussner.
Per giapé chësta puscion muessa la Provinzia frabiché y cumedé a Bulsan, Toblach, San Ciana/Innichen, Persenon, Maran y Sterzing. “Chisc lëures ie bele finei per 80%” dij l assessëur. Dlongia na lingia de autri lëures vëniel al mumënt nce scrit ora i lëures per Corvara.
Pernan che ie lëures sarà finei passerà la puscions militeres, n var al iede ala Provinzia. Deberieda cun i chemuns tuchei uniral pona tëut la dezijion co adurvé i raions che ie n pert drët granc. “L puderà unì frabicà cuatieres o strutures cumerzieles, la planificazion urbanistica ne unirà nia plu desturbeda dala casermes, la prejënza militera vën smendrida y nscì saral mesun avëi strutures nueves zënza tò puscions a privac” nsci la cuntlujion dl presidënt Durnwalder.
as
