Atualità
Dumënia ai 24, domesdì cun artisc’ tl Museum Ladin
USP – L Museum Ladin Ciastel de Tor nvieia n dumënia domesdì, 24 de utober, a n’ancunteda cun i artisc’ dla mostra Trienala Ladina y cun la davagnadëssa dl Pest de scultura Richard Agreiter.
La terza edizion dla Trienala Ladina ie unida dedicheda ala stories spidledes “Mirrored Stories”. I lëures de sies artisć ladins ie metui ora do n cuzet de espusizion particuler, ulache l vijitadëur possa cunscidré lëures te n cuntest de parëi che fej da spiedl. Trëi mënsc de mostra fina via te puec dis, cun la fin de utober. Chësta data ie nce l’ultima ucajion per udëi la scultura che à venciù l Pest ntitulà do l scultëur Richard Agreiter.
Cater di artisć che fova unic cris ora per la Trienala Ladina, Romana Prinoth de Sëlva, Barbara Tavella da La Val, Claus Vittur da La Ila y Peter Demetz de Urtijëi sarà n dumënia ai 24 de utober dala trëi domesdì nstësc tl Museum Ladin per n’ancunteda cun l publch. Deberieda cun Kathrin Partelli de Bulsan che à venciù l pest Argreiter, cunterà i artisć de si opres y de si atività.
L Museum Ladin a San Martin de Tor ie daviert dal merdi ala sada dala 10 ala 18 y de dumënia dala 14 ala 18.
as
