Atualità
Materiai didatics sön les liëndes ladines ales scores
Tl cheder dl proiet RAIS de promoziun dl plurilinguism é gnü presentà ai 27 de otober tla ciasa dla Cultura a La Ila i materiai didatics nüs sön la liënda de Fanes, plü avisa a n publich de insegnanc y scolars dles scores mesanes y altes dla Val Badia da pert di auturs.
Ara se trata de trëi elaborać, un tla forma de liber –Fanes: Lijënda y Poem-, na CD musicala y n video de Fanes Poem Musical (Roland Verra /tesć, Susy Rottonara /musighes originales) dà fora cun le sostëgn dl’ Intendënza Ladina, l’ Istitut Pedagogich Ladin y la Lia Culturala Fanes. Porater è la presentaziun gnüda sostignida dala Fondaziun Cassa de Sparagn.
Do na introduziun da pert di auturs sön la valüta dl avëi cultural scialdi antich dles liëndes ladines y na presentaziun di aspeć artistics dl poem, esun jüs ite sön la poscibilité de adorvanza scolastica de chisc mesums te n contest plurilingual y de insegnamënt de linguistica integrada (CLIL), tignan cunt che le test original ladin è tres acompagné dala traduziun ti atri lingać insignà te scora (talian, todësch y inglesc). Porater è chëstes produziuns dër adatades por fà conësce l’ aspet plü original y antich dla cultura ladina rapresentè dales liëndes inće foradecà.I materiai è a disposiziun dles scores y biblioteches y po’ gnì damanà dal publich interessè al’ Intendënza Ladina da Balsan.
usp
