Atualità
Tunel dl Prëner: cumisser Fabris da Durnwalder per finanziamënt y la scines da ruvé permez
USP – La pert taliana dl finanziamënt dl Tunel dl Prëner dëssa bele unì dat pro l’ena che vën. Nce la proietazion dl toch da ruvé permez al tunel danter Pruca y Franzensfeste dëssa unì nvià via. Chësta vijion à ncuei (5 nuvëmber) prejentà l cumisser per l tunel dl prëner, nciarià dal Guviern talian, Mauro Fabris al presidënt dla provinzia Luis Durnwalder.
Fabris à cuntà a Durnwalder dla tratatives dl cumité interministeriel per la planificazion economica CIPE (Comitato interministeriale programmazione economica) ulache l vën tëut la dezijions per l finanziamënt de majeri proiec de nfrastrutura. Aldò de Fabris dajerà la CIPE l’ena che vën cunferma de tant che la ova bele udù danora per finanzië l Tunel dl Prëner. „Tla medema senteda dëssa la CIPE nce de pro de nvië via la proietazion esecutiva per la scines da ruvé permez al tunel da Pruca suvier“ nsci Durnwalder do l’ancunteda. L ie gran ëura de tò chësta dezijion ajache l’Union Europea à bele menà do pra Roma de tò tla man la proietazion y ti à bele scurtà 12,8 milion de euro ajache la Talia ie tardiva.
Ntant à Roma bele nfurmà l presidënt dla Cumiscion europea Josè Manuel Barroso n cont di vares inant che ie unic fai per la scines da ruvé permez al tunel, la proietazion y l’ejam de cumpatibltà ambientela. Pernan che l unirà tëut na dezijion tla CIPE uniral mo de nuvëmber fat al savëi deberieda da Roma y Viena. „A chësta maniera an nce a Viena la drëta nfurmazions per pudëi ala fin de nuvëmber tò na dezijion definitiva“ nsci Durnwalder do l’ancunteda cun Fabris.
Cun Viena iel mo da stlarì ulà che la sozietà dl Tunel dl Prëner dëssa avëi si sënta. La sënta ie nce mpurtanta ajache aldò dla posizion muessel nce unì tëut n cunsciderazion i regulamënc per scrì ora i lëures.
Tl’ancunteda de Fabris cun Durnwalder iel pona unì rujenà dla cunzescion dl’autostreda dl Prëner. La sëurandata ne ie nia de cumpetënza de Fabris, ma la cunzescion cumporta nce na bela pert dl finanziamënt per l tunel dl Prëner y la scines da ruvé permez che vën tëut dal daz dl’autostreda. Ntant an de bona speranzes che la cunzescion per la sozietà dl’autostreda dl Prëner ne vënie nia scrita ora da nuef. L vën tlo pensà a slungë la cunzescion o de la sëurandé a na sozietà nueva che tol ite la ferata taliana, l’ANAS, la sozietà dl’autostreda dl Prëner y la provinzies de Verona, Trënt y Bulsan.
as
