Atualità
Jonta provinziela à tratà la reforma dla scola tudëscia
USP – Argumënt de gran pëis tla senteda dla Jonta provinziela fova ncuei (8 nuvëmber) la reforma dla scola auta. Davia che l ie mo truepa cuestions da stlarì a i assessëures ntant pudù traté la fundamëntes dla reforma per la scoles autes de rujeneda tudëscia. La reforma per la scoles autes ladines y talianes ie unida spënta.
Mpede l plann teritoriel dla scoles autes tudësces à la Jonta provinziela ncuei dat pro la fundamëntes dla reforma. Na dezijion definitiva ie ududa dant per la senteda dl 13 de dezëmber. “Dan ruvé a na contlujon iel debujën de mo ancuntedes per ruvé a una. “Debujën ie nce de despunibltà ala descuscion” à detlarà Durnwalder, sorissan che la va de abiné n plann cun armunia y nia drucan tres prutestes o azions de sotscrizions. Per la scoles autes tudësces cun 13 licei, 18 scoles spezialistiches, 11 istituc y feter 40 scoles prufesciuneles se tratela de fé na spartizion nueva che se stiza sun trëi seves: l gymnasium, la scola spezialistica y la scola prufesciunela. La soluzions possa sëuraprò nce unides abinedes tres l’autonomia de uni singula scola che à la lidëza sun 20% dl’ëures de scola. Mplu à nce la Provinzia la lidëza de tò dezijions spezifiches sun 10% dl’ëures. La Jonta provinziela à dat pro la prima letura dl plan teritoriel.
Te de vel caji muessa la scola tudëscia mo abiné na soluzion. Tla zità de Bulsan, per ejëmpl, se damanda la Jonta provinziela amaca 20 sculeies tla prima tlas per giustifiché na scola. Da stlarì iel mo la forma plu avisa dla scoles autes cun mujiga che dëssa anjenië i sculeies a zapé ite tl Conservatorio do la matura.
as
