Atualità
Scumenciadiva „Ladins tl monn“ ncuei tla televijion ladina
USP - Ncuei, 2 dezëmber mostra la RAI TV Ladina dla scumenciadiva „Ladins tl monn“, la plataforma de ancunteda y barat per ladins sun internet. La scumenciadiva dl Assessorat Provinziel Ladin pieta ucajion de cuntat danter i ladins che ie jic a viver ora per l mond y nce cun i cumpanies y parënc che vif ti luesc ladins. La documentazion de „Ladins tl monn“ unirà mustreda tl cheder dla trasmiscion Scenar, che scumëncia dala 20.30 sun l terzo canal dla RAI.
Dan doi ani fovel unì nvià via l proiet „Ladins tl monn“, na rë de cuntac che crësc n puech al iede. Ultimamënter ie nce la ciantarines Ganes da La Val zapedes ite sun chësta plataforma per mantenì cuntac ladins ntan che les viv y cianta oradecà. La plata internet www.ladinstlmonn.org ie nce n mesun per mparé a se cunëscer, se baraté ora esperienzes, jì a crì nfurmazions y se judé un cun l’auter. Chësc sentimënt de liam y unità ti da forza y mantën la cuscienza ladina. “Te n mond for plu globalisà chier la persona si ravises per nia jì sot te n sistem che porta a for na majera uniformità” à dit Mussner.
I cumëmbri dl proiet Ladins tl monn ie n gran pert jic a viver te paejes dl’Europa sciche l Deutschland, la Svizra, l’Austria, l Belgio, la Spagna, l Portogallo, la Gran Bretagna, Olanda, Svezia y Norvegia. Di 76 ladins sun la plataforma ne iel nce ti USA, Canada, Brasil, Porto Rico, Argentina, Messico y Chile. Singuli ladins che à abinà cuntac tres „Ladins tl monn“ vif tl’Asia (Giappone), Australia y Africa.
Karin Pizzinini se à dat ju cun l proiet „Ladins tl monn“ y à deberieda cun Hans Peter Karbon metù adum l program che sarà da udëi ncuei, 2 dezëmber dala 20.30 sun RAI 3 bis.
as
