Atualità
Uneranzes per l ulentariat nce a doi ladins
USP – L di dl ulentariat, n sada 4 de dezëmber ie stat ucajion per l presidënt dla provinzia Durnwalder de sëurandé set uneranzes. Danter i unerei iel nce Walter Valentin de Badia y Oskar Insam de Sëlva. Tla cësa Walther a Bulsan à l presidënt segurà de ulëi fé dut l puscibl per sustenì l ulentariat.
I mesuns finanziei a desposizion per l soziel y dantaldut per i servijes ulenteres, nsci Durnwalder, ie unic ngrandì y unirà nce i ani che vën for inò auzei. Pra la sëurandata dla uneranzes a Bulsan iel unì sorissà che l ulentariat ie na ressorsa de gran valor per la cumenanza y l’economia. “Aldò de analises l prudot soziel possen fé cont che l ulentariat porta n valor de feter 302 milion de euro y che l ie perchël na pert zentrela de dut l prudot tl Südtirol. Chësc vel per duc i ciamps te chëi che la zitadines y i zitadins se dà ca, dla soziela ala sanità, ativiteies cultureles, sport, tëmp liede, ambient o prutezion zevila”.
Per l ann europeich dl ulentariat à la Jonta provinziela pensà a na prejentazion internet dla assoziazions non-profit dl Südtirol. Chësta plata dëssa pité na luegia ulache ruva adum la nfurmazions. N servisc per la lies, per cuestions de autalità, dumandes guridiches o cuntribuc. N à nce udù dant de dé ora na relazion sun l’atività ulentera tla provinzia cun na pert zentrela dedicheda al valor soziel dl ulentariat tl Südtirol.
Cun la uneranzes à la Jonta provinziela ulù mëter tl zënter la persona nstëssa che à fat lëures straurdineres tl ulentariat y tl medemo mumënt dé atenzion ai ulenteres te duta la provinzia, i rengrazian per si mpëni a bën de duta la populazion.
La uneranza à pià do Romano Bergamo (Libera Associazione Nazionale Mutilati Invalidi Civili), Rudi Christoforetti (Heimatbühne Branzoll), Anna Egger (Katholische Jungschar Südtirols), Laura Maretto (Polisportiva Pineta Laives), Gertrud Oberrauch (VKE).
Doi unerei fej pert dla grupa de rujeneda ladina.
Walter Valentin ie dal 1997 pra i destudafuech de Badia, dal 2000 tl cunsei di parues jëuni de Badia, dal 2006 vizepresidënt de raion y dal 2008 presidënt di paures jëuni de Puster. Dal 2009 ie Walter Valentin nce tl cunsëi dl Servisc ai Jogn dla Val Badia.
Oskar Insam ie da feter 30 ani presidënt dl Sportculb Gherdëina. Ël reprejentea i ladins tla Lia da Mont provinziela AVS y ie da diesc ani dl cumitìe dl turnoi nternaziunel de tennis.
as
