Atualità
Nce tl Südtirol test de rujeneda per imigrei
USP – Prësc uniral nce tla provinzia de Bulsan scumencià cun i test de rujeneda taliana per extracomuniteres che uel giapé la lizënza de residënza per n tëmp nia determinà. La Jonta provinziela à (ncuei) ai 6 de dezëmber dat pro de mëter n drova la lege naziunela juntan nce la puscibltà de fé l test per la rujeneda tudëscia.
Cun la lege dl 4 de juni 2010 se damanda l Guviern Talian che extracomuniteres feje n test de rujeneda taliana per giapé la lizënza de sujurnanza. Chësc test muessa unì fat nchin al plu doi ani do che i ie unica adalerch y possa unì spënt de n ann sëuraprò. Sce i extracomuniteres ne passa nia l test pierdi la rejon de sujurnanza tla Talia. “Chësc test dëssa n pue’ saré l’imigrazion y ie dal’autra pert de gran utl per judé la ntegrazion” à dit Durnwalder te cunferënza stampa.
Per lege ne muessel tla provinzia de Bulsan nia unì fat l test per la rujeneda tudëscia, purempò vëniel dat chësta puscibltà. “Te n daunì possa la cunescënza dla rujeneda tudëscia vester de utl per giapé vel pruvedimënt provinziel” à dit l presidënt dla provinzia.
I particuleres dl test de rujeneda muessa mo unì fat ora cun l Cumisser dl Guviern. La Provinzia de Bulsan meterà a desposizion i locai cun computer per 150 candidac al mëns.
as
