Atualità
Bënsté per l tunel dl Prëner a Mauls
USP - La Jonta provinziela à (ncuei) 6 dezëmber dat pro la valutazion de dann ambientel dl proiet esecutif dla rola de prova dl tunel dl Prëner. La se trata dl segondo lot di lëures, che reverda l raion de Mauls tla pert auta dla Val d’Isarch.
La rola de prova reverda de plu tuniei tl raion dl culegamënt de segurëza y mo n mplant de sarenera per l’eghes dl cantier y l’eghes che vën ora dla mont. L cumité ambientel se à damandà na lingia de cundizions per pudëi realisé chësta pert di lëures. Chësta cundizions reverda sambën l ambient, l ruvé permez y la segurëza.
La Jonta provinziela à azetà la valutazion dla cumiscion ambientela, dajan pro l proiet esecutif per la rola de prova dl tunel dl Prëner tl raion de Mauls. “I lëures possa jì inant zënza se fermé, à dit Durnwalder te cunferënza stampa, chësc nce ajache l finanziamënt da pert taliana ie segurà tres l bënsté dla cumiscion CIPE (Comitato interministeriale per la programmazione economica)”.
as
