Atualità
Zirconvalaziun de Ciastelbadia: Daurida al trafich ai 22 de dezëmber
USP - Te chisc dis vëgnel stlüt jö, aladô dl plann, i laûrs valgamia ris da n punt de odüda tecnich che reverda la costruziun dla strada de zirconvalaziun de Ciastelbadia che é 1,6 km lungia. Ai 22 de dezëmber deura le Presidënt dla Provinza Luis Durnwalder y l’Assessur por i laûrs publics Florian Mussner la zirconvalaziun al trafich do la benedisciun.
Naôta àn albü problems tecnics da ćiavè sot Ćiastelbadia fora ajache i mürs de Ćiastelbadia milenars dô romagne intać. „I sun stà bugn da superè chësta dificolté tres tröpes mosoraziuns y metodes de laûr nia invasives y i sun stà bugn de mantignì le patrimone cultural“, dij l’Assessur por i laûrs publics Florian Mussner. Aladô dl Presidënt dla Provinzia Luis Durnwalder é la costruziun dl tunel sot Ćiastelbadia na pert importanta de döt le proiet por l’ampliamënt dla strada statala de Puster.
Tres le completamënt dla strada de zirconvalaziun vëgnel śëgn arjunt aladô de Durnwalder y Mussner n alisiramënt dl trafich y na miù cualité dla vita por i zitadins dl paîsc dessot a Ćiastelbadia. Sciöche preodü dal plann pon s’anuzé dla strada bele dan Nadè. Le Presidënt dla Provinzia Durnwalder y l’Assessur por i laûrs publics Florian Mussner dauriarà ai 22 de dezëmber la strada al trafich. La strada nöia gnarà benedida tl cheder de na picia festa dales 11 ti ofizi dl cantier a Ćiastelbadia.
La zirconvalaziun che é 1,6 km lungia va dal azès a vest do Ćiastelbadia ćina al punt Peintner sura la Rienz. Ara tol ite cater perts: na galaria 70 metri lungia, n tunel te tera 310 metri lunch sot le col de Ćiastelbadia, na galaria 125 metri lungia danter le col de Ćiastelbadia y le col Amtmann, y n tunel te tera 105 metri lunch sot le col Amtmann.
I colegs di media é dër bel invià a tó pert
ala festa de daurida dla zirconvalaziun de Ćiastelbadia
en mercui, ai 22 de dezëmber dl 2010, dales 11 danmisdé
pro i ofizi dl cantier a Ćiastelbadia/San Laurënz.
SAN
