Atualità
Ambolt de Corvara dal presidënt dla Provinzia
USP – A inuem dl’aministrazion nueva dl Chemun de Corvara, ie l ambolt Robert Rottonara y l assessëur Daniel Alfreider jic n vijita dal presidënt dla Provinzia Luis Durnwalder. Tl palaz Widmann a Bulsan iel danterauter unì rujenà de n zënter per la prutezion zevila.
Argumënc dl’ancunteda de Durnwalder cun i reprejentanc dl’aministrazion nueva de Corvara fova i majeri proiec che n se à tëut dant. Danter chisc nce l fé su de n zënter per la prutezion zevila, l adatamënt dla stredes y l ngrandimënt dla scola. I aministradëures de Corvara à purtà dant si vijion sun la situazion dl muvimënt de auti sun i jëufs ntëur l Sela y bujëns dl’economia turistica. „L ambolt Rottonara y l assessëur Alfreider me à purtà nfurmazion sun la situazion atuela“ nsci Durnwalder, juntan che śën dëssa l chemun lauré ora proiec per pudëi pona mëter a jì l finanziamënt deberieda cun la Provinzia. L ambolt Rottonara à detlarà de ulëi purté inant i proiec te n cuntat strënt cun l’Aministrazion provinziela, se mbincian de ruvé prësc a na cuntlujion.
Robert Rottonara fova ai 21 de nuvëmber unì lità n segondo iede ambolt. Do la veles de mei ne fovel nia stat mesun mëter su la Jonta y nsci iel sta debujën fé da nuef la veles de chemun a Corvara.
as
