Atualità
Degun cuntrat zënza bilinguism
USP – A personal de cura y educadëures de persones cun handicap che ne ova mo nia l ejam de bilinguism ti fovel tl ann 2001 unì cunzedù n tëmp de 9 ani per fé chësc ejam. Gran pert à mustrà su de savëi la rujenedes provinzieles. A chëi che ne à fat degun ejam, ne ti vëniel nia plu slungià l cuntrat de lëur.
Tl cheder dl cuntrol di enc locai, iel nce duvier dla Jonta provinziela de fé tenì ite l’acurdanza che dl 2001 fova unida azeteda da Provinzia y cumuniteies de raion canche ti fova unì sëurandat la gestion de chisc culaburadëures.
De dut l personal de cura y educadëures de persones cun handicap che ne ova mo nia fat l ejam de bilinguism i me plu restei 46. De chisc à 37 arjont l ejam de n livel plu bas y a chisc ti uniral slungià l cuntrat de lëur aldò di criteries dl ejam che i à fat. A nuef persones che ne à fat degun ejam ne ti possel nia plu unì slungià l cuntrat. “Ti de da lëur a chëi che ne respetea nia la cundizion metudes dant uel di ti fé de dann a d’autri che ëssa la cundizion y ne giapa nia da lëur” à dit l presidënt Durnwalder per spieghé la rejon de chësta dezijion dla Jonta provinziela.
as
