Atualità
Presidënt nuef y regules nueves per cuatieres IPES
USP – Konrad Pfitscher ie unì numinà presidënt nuef dl Istitut per edilizia soziela IPES. Cun 60 cuatieres nueves per la categuria de davani mesan à la Jonta provinziela (ncuei) ai 30 de dezëmber nce dat pro mudazions al regulamënt n cont de chëi che ne azetea nia n cuatier.
Do vester stat 25 ani ambolt de S.Leonhard te Passeier, ie Konrad Pfitscher unì numinà dai assessëures provinziei per la ncëria da presidënt dl IPES. “Cun si esperienza da ambolt, aministradëur tla cumunità raionela y fundadëur dla sozietà per l’energia tl Passeier, ie ël dessegur la drëta persona per nvië via na urganisazion nueva dl IPES” à dit l presidënt Durnwalder te cunferënza stampa. Pfitscher tol ite la ncëria che à lascià Albert Pürgstaller.
La nuvità data pro dala Jonta provinziela reverda l regulamënt per chëi che ne azeteda nia l cuatier che ti vën metù a desposizion. “Chëi che ne azetea nia l cuatier che ti vën dat sun la basa dla graudatories, ne puderà mei plu giapé n cuatier” à spiegà Durnwalder. Sun 85 cuatieres nueves che ie ultimamënter unic metui a desposizion ne ie 16 nia unic azetei. “Families che ne à nia azetà chisc cuatieres ne se merita nia de ne n giapé n’auter frabicà cun scioldi dla chëutes” à dit l presidënt tla cunferënza stampa.
Cun la fin dl ann iel nce unì dat pro 60 cuatieres nueves tl raion Kaiserau/Casanova a Bulsan per families che à n davani netto nchin a 50.000 euro al ann. Chisc cuatieres possa damandé families cun uem o fëna sota 40 ani y cun doi mutons. “Cun chësc pruvedimënt vëniel fat n var inant per la families che à n davani de categuria mesana” à dit Durnwalder. I cuatieres possa unì nuzei per 10 ani y muessa pona unì dai inant.
as
