Atualità
Diretëura dl archif tla cumiscion de Hall
USP – Tla cumiscion che dëssa stlarì l cajo di morc suplì ntan l tëmp dl nazism tla curtina dla tlinica psichiatrica de Hall tl Tirol, dëssa nce lauré pea n reprejentant dl Südtirol. La Jonta provinziela à numinà la diretëura dl archif provinziel, Christine Roilo.
La recostruzion dl cajo di morc abinei suplì dlongia la tlinica psichiatrica a Hall tl Tirol di tëmps da ditatura nazionalsozialista va inant. Danter l 1942 y l 1945 dëssel vester unì suplì 220 persones. Aldò de prima ndicazions dëssel danter chëstes nce vester vitimes de n program de eutanasia di nazisć. Danter chëstes dëssel nce vester jënt dl Südtirol, ajache plu da giut univa persones cun problems psichics purtei a Pergine tl Trentin o a Hall tl Tirol.
L presidënt dl Tirol Günther Platter ie stat a una cun l presidënt Durnwalder che tla cumiscion nia dependënta per stlarì chësc cajo tragich, dëssel nce vester na reprejentanza dla Provinzia de Bulsan. La Jonta provinziela à numinà la storica Christine Roilo, diretëura dl Archif provinziel a Bulsan.
as
