Atualità
Reforma dla scola auta ladina: da proscima ena cater manifestazions de nfurmazion
USP – Mudazions y nuviteies che la reforma dla scoles autes porta tla valedes ladines unirà prejentedes te cater manifestazions. La prima scumëncia l’ena che vën te Sëlva y a Urtijëi, pona jirala inant a La Ila y a S.Martin de Tor.
Cun la reforma dla scola auta, à la Jonta provinziela urganisà da nuef la vela de furmazion per i jëuni danter 14 y 19 ani. Cie che se muda cuncretamënter tla scoles autes ladines, cie che l unirà pità da nuef, ciunes che ie la pusciblteies de furmazion y cie che l proscimo ann de scola purterà a livel pedagogich y de cuntenut, uniral prejentà te ancuntedes cun duc i nteressei. La nfurmazions de prima man ie dantaprima pensedes per i sculeies che fina la scola mesana y si genitores.
Cun cater manifestazions pieta la Ntendënza nfurmazion de persona. La prima unirà tenida n mierculdi ai 19 de jené dala 14.30 tla cësa de cultura „Oswald von Wolkenstein“ y l medemo di dala 20.00 tl’Aula Magna dl Istitut Raetia a Urtijëi.
Tla Val Badia unirà la manifestazions de nfurmazion tenides l mierculdi dl’ena do, ai 26 de jené dala 15.00 tla scola mesana de La Ila y pona dala 20.00 tl salf di Studafüch de S.Martin de Tor.
Pra la cater manifestazions de nfurmazion tenirà l ntendënt Roland Verra na ntroduzion. Deberieda cun l’ispetëura Rosmarie Crazzolara prejeteral pona la nuviteies per la scoles autes ladines. Nfurmazions spezifiches sun la scoles autes ti luesc ladins prejenterà nce i diretëures dla scoles autes.
Mplu iel nce da pudëi liejer do nfurmazions sun la reforma dla scola auta sun la plata internet www.schulreform.bz.it/la che ie nce unida anjenieda tla rujeneda ladina.
as
