Atualità
Scumencià a traté la lege urbanistica
USP – La Jonta provinziela à te si segonda senteda dl ann nuef (ncuei, ai 17 de jené) scumencià a traté la lege urbanistica. Danter la truepa cuestions che dëssa unì reguledes da nuef, à l presidënt Durnwalder prejentà n valgun ponc de referimënt: scemplificazion, pruzedures che va plu debota ma zënza lascé pro speculazion.
La materia ie drët zitia, perchël fej la Jonta provinziela cont cun de plu mënsc dan ruvé a na pruposta de lege definitiva per regulamenté da nuef l’urbanistica provinziela. L plann urbanistich dëssa aldò de Durnwalder pudëi unì adatà plu debota. L prinzip dëssa vester chël de ruvé a una, de chësc vies dëssa la despuscions me plu deventé n cajo de ezezion. Debujën iel nce de planns sëuracumenei, dantaprima per tant che reverda la strutures.
Cuestions da stlarì reverda danterauter nce cubatura turistica che fova unida frabicheda per n ampliamënt cualitatif y che ne vën nia plu adurvà per chëla rejon, ma che n ulëssa adurvé per cuatieres. Mëndra mudazions al plann urbanistich dëssa n cajo nce vester mesun me cun na delibra dla jonta chemunela. Te caji ulache l plann de atuazion ie laurà ora drët a puntin, dëssel nce vester mesun frabiché zënza cunzescion dl chemun, ma me cun na comunicazion de canche scumëncia y canche ie finei i lëures: nsci la vijion dla Jonta provinziela.
Danter la cuestions prejentedes te cunferënza stampa iel nce i raions de produzion per chëi che l vën for inò damandà de pudëi frabiché berstotes cun n cuatier sëuraprò. “Nce tlo iel da cialé danora, ajache ne ulon nia che pona tl daunì vëniel su problems che per la jënt che viv tl raion de produzion iel massa fuera y mpaziamënt dl’aria” à dit Durnwalder.
N majer argumënt che muessa mo unì analisà miec ie la cunvenzions di cuatieres: al mumënt iela nscila che per l frabiche alesirà iel cunvenzions che dura 30 ani y per i autri cuatieres dura la cunvenzions per for.
La Jonta provinziela se à tëut dant de smëndrì burocrazia tl ciamp urbanistich y de scurté i tëmps de puzedures, perchël traterala for inò chësc argumënt danter analises y ancuntedes cun grupes de nteres. Per l instà fejen cont de pudëi de pro l dessëni de lege da dé inant al Cunsëi provinziel.
as
